Opozita do të mbështesë çdo vendim të qytetarëve për protestën e 16 shkurtit. Kjo është deklaruar nga kreu i Grupit Parlamentar të PD-së, Edmond Spaho, sipas të cilit ende nuk ka një vendimmarrje nga partitë e opozitës për mënyrën sesi do të zhvillohet protesta para godinës së Kryeministrisë.
“Për mënyrën se si do të zhvillohet protesta, sigurisht do të ketë një vendimmarrje që do të merret gjatë këtyre ditëve, por nëse vendimi i qytetarëve do të jetë që ata të qëndrojnë aty, sigurisht që ne do t’i mbështesim. Qëndresë deri sa të japë dorëheqjen Kryeministri”, shprehet Spaho për “Panorama”.
Përsa i takon deklarimeve të Policisë së Shtetit për skenarë dhune në protestën e 16 shkurtit, nënkryetari demokrat thekson se këto janë skenarë të përdorur nga Policia e Shtetit për të dekurajuar qytetarët të marrin pjesë në protestë.
“Janë skenarë të vjetër të Policisë së Shtetit. Qëllimi kryesor i tyre është të trembin qytetarët që do të marrin pjesë në protestën e 16 shkurtit, duke menduar se ata nuk do të vijnë. Asnjë skenar të tillë nuk ka nga ana e opozitës. Ne kemi marrë të gjitha masat që të garantojmë një protestë paqësore. Këtë gjë, Partia Demokratike e ka bërë në çdo protestë të thirrur prej saj në të shkuarën”, u shpreh Spaho.
Lidhur me kërkesën e opozitës për një qeveri tranzitore, kreu i deputetëve demokratë sqaron se PD do të pranonte edhe një Kryeministër socialist, por jo Edi Ramën.
“Ne do të pranojmë një qeveri tranzitore me një Kryeministër socialist, mjafton që Edi Rama të largohet. Duhet të jetë një person me kredibilitet në krye të kësaj qeverie, që do të përgatisë një proces të rregullt zgjedhor”, shtoi ai.
