Dy ndryshimet e bëra së fundmi në ekip duket se kanë shkundur ndjeshëm pozicionin e disa lojtarëve që ishin deri në njëfarë pike titullarë të padiskutuar.
Teqja është i pari që duhet të mendojë për të bërë punën më fort dhe më me pasion, nëse dëshiron të rimarrë pozicionin e tij mes shtyllave, ndërsa nga ana tjetër klubi fiton një bast me Pëllumbin. Të gjithë u çuditën me largimin e Alitit duke menduar se prapavija mbeti bosh, por paraqitja e bërë nga Pëllumbi tregoi se korçarët e kanë një tjetër element të fortë në këtë repart që vetëm me më shumë minuta dhe eksperiencë mund të bëhet një nga titullarët stabël të Skënderbeut.
Nëse për prapavijën duket se është një alternativë më shumë, me Pervan, Sibon dhe Taipin gjithnjë e më tepër faktorë te Skënderbeu, por edhe Toskiçin që ka zhvilluar takime në nivel të lartë, duket se konkurrenca rritet ndjeshëm edhe për Gripshin.
Sulmuesi i ardhur nga Durrësi duket se ka disa javë që nuk po jep atë çfarë të gjithë presin, teksa tani sinjali është dhënë i qartë. Konkurrenca pas merkatos së janarit është e fortë në radhët e korçarëve dhe nëse nuk do të ishin të gjithë lojtarë të huaj atëherë do të ishte situatë krejt tjetër edhe për shumë lojtarë të tjerë në formacionin bazë të Skënderbeut.
