“O hiq videon, o erdhëm e të shkrimë”, është kërcënimi që gazetarja Anila Basha u shpreh në emisionin “Opinion” se kishte marrë pas publikimit të skandalit seksual në të cilin ishte përfshirë polici Berhan Bajrakurti.
Deklaratën gazetarja e bëri teksa tregoi sesi e kishte zbuluar këtë videoskandal, ndërsa tha se: “Unë penalisht nuk e dënoj dot policin, por moralisht kjo është e qartë”.
Anila Basha, media e të cilës publikoi së pari videoskandalin, në të cilën shfaqej një efektiv i policisë së shtetit, konkretisht Berhan Bajrakurti, duke kryer veprime të turpshme me një 15-vjeçare, ka tregoi se si e ka zbuluar këtë rast.
Sipas saj, denoncuesi është anonim, dhe as ajo nuk e di kush është ai, ndërsa tha se i ka thënë se do largohej menjëherë jashtë vendit pasi fillon gjakmarrja.
“Ai kishte denoncuar dy herë, një herë në Koplik e një herë në Shkodër. Ai ishte i bindur në atë që denonconte. I thashë se a e di që mund të përballesh me një denoncim të rremë, ai më tha unë e di çfarë po bëj, dhe do të largohem nga vendi, pasi menjëherë pas kësaj do të fillojë gjakmarrja.
Videoja ka ardhur nga një person anonim, të cilin nuk e dimë se kush është. Po ashtu ai më tha se të tilla raste janë plot në këtë shkollë”, – tha Basha.
I pyetur nga gazetari Blendi Fevziu, po sikur të mos jetë e vërtetë, ajo tha:
“Nuk ka problem për mua. Që kur ky polic bën të tilla akte, ai nuk duhet të jetë më pjesë e forcave policore”.
Gazetarja bëri të ditur, se pas këtij denoncimi llogaria në “Facebook” e denoncueses Marsela Malësorja është mbyllur.
