Nga Boldnews.alMe fytyrë të ngrysur dhe barrë mbi supe për skandalin seksual të radhës me protagonist policin pervers të Malësisë së Madhe, ministri i Brendshëm Sandër Lleshaj po mundohet të tregojë “forcën e shtetit” para skandaleve seksuale të ditëve ntë fundit, në Kavajë dhe Malësinë e Madhe.
“Policët nuk janë të Lleshajt, por të Shqipërisë. Lleshaj identifikohet pa dyshim me policët që sot arrestuan një pervers, me policët që sakrifikojnë natë e ditë duke shërbyer”, shkrujti Lleshaj në një shënim në rrjetin social.
Brenda një jave policisë i kanë shpërthyer në duar dy ngjarje të rënda. Strukturat e rendit në Kavajë, dyshohet se nuk reaguan në kohë ndaj dhunës seksuale dhe shantazhit nga tetë djem mbi 13-vjeçaren nga Kavaja. Pa u mbyllur ende kjo plagë e hapur, specialisti i policisë në postën e Gruemirës në Malësi të Madhe Berhan Bajrakurti shfaqet në një video perverse teksa ngacmon seksualisht një vajzë 15-vjeçare.
Më shumë se çmenduaria e një efektivi vlen mënyra si ai ishte rekrutuar. Në vitin 2009 Bajrakurti u largua nga strukturat e Policisë së Shtetit për shkelje të rënda në ushtrimin e detyrës, por ditët e arta për të ërshën katër vite më vonë. Gjeti oazin e tij pranë PS-së dhe në fund u shpërblye me rikthimin në detyrë.
Sot Lleshaj për këtë skandal udhëtoi drejt Malësisë së Madhe, ndoshta për të shkundur drejtuesit atje për të marrë masa ndaj çdo punonjësi që abuzon me detyrën, por ministri në pak më shumë se dy muaj është bërë “gjeneral politik” në mbrojtje të pushtetit.
I ardhur me shumë bujë në nëntorin e vitit të kaluar dhe me premtime të mëdha se do ndryshonte fizionominë e policisë, Sandër Lleshaj pati ditën e parë të errët që në momentin e parë kur u përball me një protestë serioze të banorëve të Unazës së Re. Nga përplasja me protestuesit para Parlamentit, humbi njërin gisht nga shpërthimi i kapsollave efektivja e repartit “Shqiponja”, Ina Nuka.
Përveç ngjarjes së rëndë, gjenerali, tashmë në postin e ministrit të Brendshëm, nuk po e kuptonte sesi përballë një turme të acaruar u vendosën kordonë me police femra të pa specializuara për raste të tilla, ndërsa mbaheshin në “garazh” pononjësit e policisë që shërbejnë për shpërndarje turmash të acaruara.
Ndoshta që nga ai moment u zotua me veten se policia duhet të tregonte “dhëmbët” para krimit… dhe krimin e “madh” e gjeti tek studentët protestues… Nuk mund të shiqten nga memoria ato momente kur punonjës të policisë së shtetit mësynë në fakultete dhe ushtruan dhunë ndaj studentëve që protestonin për të drejtat e tyre.
Përsëri Lleshaj pa se nuk ishte aq e lehtë të menaxhojë një polici, drejtuesit e së cilës ishin ende të dehur nga paraja e kanabisit që mbuloi vendin, sidomos përgjatë viteve 2016-2017. Nga gjeneral, Lleshaj shpejt u kthye në Rilindas, në pamundësi për t’iu shmangur tundimit që të ofron karrigia e pushtetit.
Me të shkuar të pastër, gjenerali po bëhet me dëshirë pis në moçalin politik, teksa nuk ka ngurruar të përfshihet edhe nën emocione para akuzave politike në Parlament. Fjalë pakët, por të hidhura lëshoi në sallën e Kuvendit ndaj deputetëve të opozitës dhe kaq mjaftoi që ministri i ardhur me shumë pretendime të kthehet në mashë të kryeministrit Rama dhe taborrit të Rilindjes.
Gjsnerali është ende në kohë të bëjë prapa-kthehu, në rreshtin ku qëndron “grupi i gatshëm i Rilindjes”, për të mos u identifikuar me kanakare të Edi Ramës, që i përfaqëson denjësisht, deri në perversitet politik dhe etik nga Elisa Spiropali.
