Nga Boldnews.al
Kryetari i Bashkisë Tiranë Erion Veliaj u akuzua nga biznesmeni dhe deputeti kosovar Ramiz Kelmendi si shantazhues dhe person i cili jo vetëm i “doli nga besa”, por po bën edhe shkelje ligjore, duke i tjetërsuar pronën.
Gjithçka lidhet me një objekt tregtar që Kelmendi parashikonte të ngrinte në afërsi të Kthesës së Kamzës, ku kishte aplikuar për leje në Bashkinë Tiranë, madje ishte pritur disa herë dhe marrë përgjigje pozitive nga kryebashkiaku Veliaj për zhvillimin e zonës.
Po Lali Eri, i është përgjigjur deputetit të LDK-së, Ramiz Kelmendi, duke treguar “ligjin” dhe sipas tij nuk mund të zhantazhohej nga askush pasi për të e “para është Tirana”. Veliaj argumenton në qëndrimin e gjatë të tij se zona ku Kelmendi kishte parashikuar ndërtimin e një qendre tregtare dhe shërbimesh të tjera do të bëhet terminal i autobusëve dhe stacion treni. Për këtë qëllim, Kelmendi do të shpronësohej sipas ligjeve të shtetit.
Por Lali Eri ligjin e bën si Maliqi, të cilën e interpreton sipas interesave të ngushta personale dhe oligarkike të tij. Rasti më tipik është dhënia e lejes për zhvillim të zonës pranë Teatrit Kombëtar. Subjekti privat, i privilegjuari “Fusha sh.p.k” dispononte një truall me sipërfaqe të vogël.
Bashkia Tiranë, përbri rripit të tokës së privatit, kishte një sipërfaqe të madhe dhe me “procedurë të përshpejtuar” me një projektligj haptas në kundërshtim me ligjin, dha me koncesion jashtë procedurave konkurruese 8,465 metra katrorë tokë publike në qendër të Tiranës. Toka është vlerësuar sipas një vendimi dukshëm edhe ai korruptim, për 500 milionë lekë, ose më pak se 470 euro për metër katror, në një zonë ku një apartament i zakonshëm kushton mbi 2500 euro.
Leje për shtatë kulla, favorizim me truallin 8, 465 metra katrorë ishin “paja” që Lali Eri dhe Edi Rama i dhanë klientit të preferuar “Fusha sh.p.k”. Për herë të parë në historinë e Shqipërisë, Parlamenti hartoi ligj të veçantë për interesin personal dhe të kompanisë, aq sa mbuluan “turpin” edhe pasi Komisioni Europian quajti të papranueshëm, pasi shkilte normat e konkurencës, duke përjashtuar subjektet e tjera.
Nuk është rasti i vetëm që Bashkia Tiranë favorizon kompani dhe biznesmenë të përvetshëm, duke u ofruar troje dhe toka shtetërore, ndërsa nga ana tjetër Lali Eri të tregon ligjin, tjetërson prona private nën kleçkën ligjore të “shpronësimit për interes publik”.
