Ole Gunar Solskjaer ka paralajmëruar skuadrën e tij se pa Nejmarin dhe Kavanin, PSG do të jetë akoma më e paparashikueshme sot në duelin e parë të 1/8-ave të Ligës së Kampionëve në “Old Trafford”.
Ndeshja juaj e parë në Europë dhe menjëherë përballë një kundërshtari të vështirë, PSG-së.
Është një ndeshje fantastike dhe ne mezi po e prisnim këtë turne. Është një test për të gjithë ekipin. I kemi dhënë vetes shanset më të mira për formën në të cilën vijmë në këtë takim. Jemi optimistë dhe dukemi si një skuadër. Nëse do kishte moment më të mirë për të luajtur ndeshjet e mëdha, ai është tani.
Dhe PSG është vetëm fillimi, sepse kalendari i Junajtid tani nis të vështirësohet.
Do të luajmë kundër disa ekipeve të mëdha në ndeshjet e ardhshme, por tani jemi të përqendruar vetëm te kjo. Mezi po e presim dhe nuk jemi të shpërqendruar për atë që do të vijë më pas.
Do ta ketë më të lehtë Junajtid me një PSG pa Nejmar, Kavani, Munie?
Çdo skuadre që do t’i mungonin këta lojtarë do ta ndjente efektin, por kjo do t’u japë të tjerëve një shans. Kjo i bën më të paparashikueshëm për ne. Nuk dimë kush do luajë, dhe kur je mësuar me atë treshe sulmi gjatë gjithë sezonit nuk e di çfarë të presësh. Tani po ulemi të parashikojmë se si mund të luajnë.
Junajtid-PSG nuk janë ndeshur kurrë në Champions, por ju e keni një precedent…
Luajta kundër tyre në Kupën e Kupave 1995. Por diferenca e atij ekipi me këtë të tanishmin është fantastike. Ata janë përmirësuar dhe kanë afruar disa prej lojtarëve më të mirë në botë. Në portë kanë një prej legjendave të botës Bufon, ndërsa Tiago Silva ka qenë një prej qendërmbrojtësve më të mirë në botë vitet e fundit dhe kanë një prej talenteve më ekzaltues si Mbape dhe lojtarin më të shtrenjtë, Nejmarin.
Çfarë do kërkoni nga lojtarët në fushë?
Si lojtarët ashtu edhe tifozët mezi i presin këto mbrëmje, sepse ato janë dhe kanë qenë gjithnjë speciale. Mbrëmja ime e fundit ka qenë kur mundëm 7-1 Romën. Unë luajta në atë ndeshje dhe ishte një mbrëmje tipike “Old Trafford”-i. Humbëm 2-1 në Romë dhe trajneri ishte mjaft i gëzuar. Ai kishte besim në aftësitë tona. Unë dua që lojtarët e mi të hyjnë me të njëjtin besim dhe ta pushtojnë ndeshjen.
Probleme me skuadrën?
Na mungon vetëm Valencia dhe Darmian. Vetëm ata nuk janë të disponueshëm. Kemi një skuadër të madhe, të fortë dhe të shëndetshme, nga e cila kemi shumë alternativa për të zgjedhur.
Me një seri të tillë rezultatesh, mendoni se drejtuesit do ta kenë më të lehtë për të konsideruar të ardhmen tuaj në fund të sezonit?
Po, shumë e thjeshtë do të jetë, por ndërrojeni skenarin, sepse ka shumë mënyra për ta bërë këtë pyetje. Sezoni do edhe disa muaj që të përfundojë.
A mund të bëjë ky Junajtid mrekullinë dhe të shkojë deri në finale?
Mendoj se skuadra është shumë e aftë për të mundur këdo dhe ne hyjmë në çdo ndeshje me besim te forma jonë dhe mezi po e presim PSG-në. Por nuk mund të shohim kaq larg. Duhet të mendojmë vetëm për PSG-në dhe ndeshjen e ardhshme si do na vijë. Ne jemi të kënaqur me sjelljen dhe nëse vazhdojmë të punojmë çdo ditë mund të përmirësohemi akoma më shumë dhe ndoshta surprizojmë disa.
