Këtë të marte ish-kryeministri Sali Berisha ka denoncuar në “Facebook” një rast të tentativës së përdhunimit të një studenteje në fakultetin Juridik të Shkodrës nga një polic i Forcave të Ndërhyrjes së Shpejtë.
Berisha i referohet mesazhit, sipas tij të nisur nga një student i këtij universiteti i cili i shkruan se prej dy ditësh një polic i veshur civil ngacmon vajzat e fakultetit dhe njërën ka tentuar ta përdhunojë.
Madje sipas tyre ka ngacmuar edhe një pedagoge të këtij fakulteti.
VIDEOJA E STUDENTËVE/
REPLIKATStudenti: Ku me t’njoh unë ty.
Polici: Kemi ardhur, policë jemi.
Studentja: A ke vërtetim që jeni polic.
(efektivi vrapon për të dalë, roja dhe studentët e tjerë i shkojnë nga pas për të mos e lënë të ikë)
Studentja: Prit një sekondë se ka qenë edhe dje. A nuk ka tualete lokali apo ambiente të tjera që vini e hyni në ambientet e shkollës apo si?
(roja kyç derën, bashkë me studentët rrethojnë policin e nuk e lënë të dalë, pas disa minutash vjen policia dhe e merr)
Studentja: Me duar në xhepa, o zotëri ne nuk e morëm me e përcjellë në kafe.
Studentët pretendojnë se policin e FNSH të veshur civil siç vërehet edhe në video e kanë mbajtur të izoluar në ambientet e fakultetit deri në momentin e mbërritjes së forcave të policisë të cilët kanë bërë edhe shoqërimin e tij në komisariatin e Shkodrës.
Efektivët e Shkodrës e kanë dërguar tek Shërbimi për Çështjet e Brendshme dhe Ankesat. Ndërsa për këtë ngjarje burime pranë policisë Shkodër japin një tjetër version. Sipas policisë, ndryshe nga sa pretendojnë disa studentë, efektivi i FNSH-së në momentin që ka ngacmuar një vajzë ka qenë në rrugë dhe jo brenda fakultetit. Policia mohon që të ketë pasur kërcënime ndaj vajzës duke sqaruar se efektivi e ka pëlqyer atë dhe e ka ndaluar.
Në momentin që ka tentuar ta kapë për krahu për të folur me të vajza ka parë se efektivi kishte në brez pistoletën dhe është frikësuar.
Sipas policisë efektivi i FNSH ka të drejtë që ta mbajë armën e punës edhe kur është civil.
Gjithashtu burime nga policia thonë se gjatë marrjes në pyetje efektivi ka mohuar ta ketë mbyllur studenten në tualet dhe se nuk e ka kërcënuar. Ai ka rrëfyer se e ka pëlqyer atë dhe se si një djalë i ri ka dashur që të bisedojë, por ka hasur në rezistencën e vajzës e cila më pas është frikësuar nga arma e shërbimit që kishte në brez.
VIDEOJA E SHOQËRIMIT TË POLICIT CIVIL
