Nga Boldnews.al
Largimet e padrejta nga puna, për strukturat e shtetit shqiptar është vetëm një statistikë, por për arkën e saj një humbje e madhe, përgjegjësinë e së cilës nuk e mban askush. Mbi 70 milionë euro ka shpenzuar shteti në gjyqet e humbura me objekt padie: “Heqje e padrejtë nga puna”. Kjo shifër i përket periudhës së qeverisjes socialiste, në aleancë apo e vetme.
Për këtë “borxh të fshehur” nuk mban përgjegjësi asnjë zyrtar i lartë, që me një të rënë lapsit shkarkon punonjësit pa motivacion. Ditën e sotme, kreu i shtetit Ilir Meta u shpreh se duhen ndryshime ligjore që nëpunësi përgjegjës që ka shkarkuar padrejtësisht nga puna vartësit dhe më pas ata fitojnë gjyqin, të mbajë përgjegjësi penale, apo civile.
“Duhet të përcaktohet me ligj evidentimi i përgjegjësisë direkt të zyrtarit publik për shkarkime të padrejta nga puna, si përgjegjësi penale, duhet dispozitë e vecantë në kodin penal, por edhe financiar për cdo dëm që i shkaktohet buxhetit. Fatura e përballimit të dëmit t’i kalojë zyrtarit që ka marrë vendimin e padrejtë. Dëmi nuk mund t’i ngarkohet taksapaguesit shqiptar, që janë të dëmtuarit kryesorë në këtë rast”- tha Meta.
Ajo që ka ndodhur në administratën shqiptare i ngjan një sëmundje kronike, ku sa herë ndërrohen pushtetete nisin largimet masive nga puna. Rilindja erdhi me premtimin se do të ngrinte një administratë në shërbim të qytetarëve, por shpejt u kthye në një “organizatë partie”, që shërbente si zyrë pune për militantët e saj.
Shuma prej 70 milionë euro detyrime për tu paguar ndaj personave të larguar pasdrejtësisht nga puna i përkon viteve 2014-2018, por kjo kosto jo vetëm nuk do të ulet, por pritet të ketë një tjetër kolpo, që në fund janë taksat e qytetarëve të cilët indirekt paguajnë dy administrata, atë që zyrtarisht është në detyrë dhe armatën e të larguarve që kanë fituar proceset gjyqësore.
Në Gjykatat Administrative konfirmohet se ka një fluks të madh të padive civile në gjykatë me objekt: “Largim i padrejtë nga puna”, për periudhën 2017-2018. Kjo përkon pikërisht në kohën kur PS mori e vetme “tepsinë e pushtetit” dhe nisi reprezaljen në administratë, duke shfarosur të parët nga zyrat e shtetit ata që ishin etiketuar si të LSI-së.
Në mbi 80 % të rasteve të trajtuara nga gjykata i japin të drejtë paditësve, për shkak të shkeljeve të dukshme që konstatohet në shqyrtimin e rasteve nga ana e drejtuesve të administratës publike. Proceset e gjyqeve në një mesatare zgjasin deri në tetë muaj, për shkak se është bërë rutinë apelimi i vendimeve nga ana e strukturave shtetërore. Më shumë se për të fituar çështjen e përdorin këtë formë për të shtyrë në kohë dëmshpërblimet për largimet e padrejta nga detyra.
Sot jemi përpara një shifre të tmerrshme përsa i përket largimit me pa të drejtë nga puna të nëpunësëve të administratës shtetërore, ndërsa qytetarët detyrohen të “paguajnë” dy administrata, kryeministri mburret me portalin “shqipëriaqëduam”.
