Skënderbeu-Laçi mbyll javën e 21-të të Kategorisë Superiore dhe kurbinasit kanë udhëtuar drejt Korçës me mendje të ndarë. Trajneri Besnik Prenga, në prononcimin e dhënë për “Panorama Sport” një ditë para ndeshjes, pohoi se për vetë situatën, takimi do të jetë i vështirë për të dyja ekipet.
Prenga pohon se Skënderbeu vjen pas 6 humbjeve radhazi dhe nuk ka çfarë të humbasë, por Laçi do të zbresë në fushë për të marrë fitoren. Trajneri i skuadrës kurbinase deklaron se Skënderbeun e vlerësojnë nga ajo që i ka dhënë futbollit shqiptar në këto vitet e fundit dhe jo nga humbjet radhazi në këtë sezon, ndaj ai mendon se sot ata luajnë ndeshjen më të fortë të 2019-ës. “Për ne është një sfidë e vështirë, por e tillë është edhe për Skënderbeun.
Gjithsesi, e pranoj se humbja e fundit me Luftëtarin ishte një mësim i mirë për ne, na uli me këmbë në tokë. Tani pres reagim dhe përgjigje pozitive nga ekipi, duke filluar që në ndeshjen e sotme me Skënderbeun. Situatën në skuadër e kemi të mirë, pasi nuk kemi dëmtime problematike.
Grupi është thuajse i plotë dhe mezi presim sfidën me Skënderbeun. Me ardhjen e Antoni Okpotu, që iu bashku skuadrës para dy ditëve, është plotësuar grupi dhe afrimet e janarit shpresoj që të na ndihmojnë me paraqitjen e tyre”, përfundoi trajneri i Laçit, Besnik Prenga.
