Presidenti Meta ka kërkuar që Gjykata Administrative, që po përballet me një fluks rastesh që janë për tu shqyrtuar duhet të plotësohet me trupën e nevojshme të gjyqtarëve, në mënyrë që të shmanget vonesat.
Më tej ai tha se në rastet e largimeve të padrejta nga puna, fatura financiare duhet t’i kalojë zyrtarit që ka dhënë vendimin e padrejtë dhe në shkelje të ligjit.
Kreu i Shtetit i bërti deklaratat e mësipërme në konferencën e organizuar nga INFOÇIP me temë “Marrëdhëniet e Punës dhe Shqyrtimi Gjyqësor”.
“Numri në rritje i konflikteve gjyqësore dhe me një trupë gjyqësorë ende të paformuar sjell vonesa në vendime. Gjykata administrative duhet të plotësohet me trupën e nevojshme. Është rritur numri i konflikteve në marrëdhëniet e punës dhe 30% e rasteve në Administrative janë për problemet në marrëdhëniet e punës. Duhet të përcaktohet me ligj evidentimi i përgjegjësisë direkt të zyrtarit publik për shkarkime të padrejta nga puna, si përgjegjësi penale, duhet dispozitë e vecantë në kodin penal, por edhe financiar për cdo dëm që i shkaktohet buxhetit. Fatura e përballimit të dëmit t’i kalojë zyrtarit që ka marrë vendimin e padrejtë. Dëmi nuk mund t’i ngarkohet taksapaguesit shqiptar, që janë të dëmtuarit kryesorë në këtë rast.” – theksoi Meta.
