Një tjetër rast i rëndë me ngacmime seksuale të nxënësve të mitur është regjistruar në Kosovë, ndërsa policia ka arrestuar një mësues të gjuhës shqipe.
Mediat raportojnë se zyrtarisht ndaj mësuesit B.V., nga Komuna e Gjakovës, është ngritur aktakuza për veprën penale “keqpërdorimi i personave nën moshën 16 vjeçare”.
“Nxënëset e shkollës fillore “Mazllum Këpuska” të Gjakovës kanë rrëfyer për ngacmimet që u ka bërë gjatë orëve mësimore arsimtari i tyre i gjuhës shqipe. Ato kanë treguar se si arsimtari u prekte flokët, disa pjesë të trupit dhe fliste fjalë të pista përgjatë orëve të mësimit”, raporton Express.
Arrestimi dhe aktakuza janë konfirmuar në një njoftim zyrtar të Prokurorisë Themelore të Gjakovës.
Rrëfimet e vajzave fillimisht u publikuan nga KlanKosova.
Ky është skandali i tretë me sfond seksual që denoncohet në vetëm pak ditë. Dy prej skandaleve kanë ndodhur në Kosovë, ndërsa një tjetër në Kavajë.
