Skënderbeu ka humbur shkëlqimin që ishim mësuar të shihnim në vitet e fundit. Skuadra kampione e Shqipërisë ka pësuar shumë ndryshime në merkaton e verës dhe nëse deri në gjysmën e parë të fazës së dytë mendonim se ekipi ishte sërish kompetitiv dhe i rrezikshëm, gabuam të gjithë.
6 ndeshjet e fundit në kampionat kanë qenë katastrofale për skuadrën korçare. Ekipi ka rrëshqitur keq në renditje dhe tashmë e sheh me dylbi kreun e klasifikimit, 13 pikë larg janë shumë, vërtetë shumë për një klub që ka dominuar kampionatin tonë në dekadën e fundit.
Takimi i radhës do të jetë shumë i rëndësishëm për skuadrën e Orges Shehit që do të ndeshet me Laçin në Korçë. Një tjetër humbje mund të përjetohej si “tragjedi” dhe mund të shoqërohet dhe me largimin e numrit një të stolit. Situata nuk është aspak e mirë dhe forca e skuadrës nuk është aty ku duhet me ndryshimet e fundit. E hëna mund të jetë vendimtare për Skënderbeun. /Tele Sport/
