Kryebashkiaku i Tiranës, i njohur për investimin e tij të thelluar në imazh, ka shpallur ndër prioritetet e mandatit të tij pastrimin e qytetit dhe krijimin e korsive të biçikletave. Erion Veliaj nuk lë rast pa i përmendur këto dy prioritete në kronikat e tij të gatshme, që shpërndan për redaksitë e televizioneve kryesore në vend.
Por, përtej imazheve të kuruara mirë mediatikisht, realiteti është tërësisht ndryshe në rrugët e Tiranës. Vendet e mbledhjes së mbeturinave qëndrojnë me ditë pa u pastruar, ndërkohë që korsitë e biçikletave janë bërë pa asnjë plan.
Shpeshherë, biçiklistëve u duhet të përballen me këmbësorët dhe, sidomos me automjetet. Por, në rastet si në fotot më poshtë, drejtuesit e biçikletave duhet të përballen gjatë ditës edhe me makinat e rënda që mbledhin mbeturinat.
Siç shihet, makina e rëndë ka bllokuar një korsi të tërë biçikletash, ndërkohë që ka bllokuar edhe gjysmën e korsisë së automjeteve. Fotoja është realizuar paraditen e së Premtes, në një prej rrugëve pranë qendrës së Tiranës. /Boldnews.al/
