Kryeministri Edi Rama nuk njeh limite në propagandë. Këtë të premte, ai ka përdorur familjen e të miturës së abuzuar në Kavajë për të treguar se qeveria e ka ‘zemrën e madhe’.
Një video e një vizite të Elisa Spiropalit në banesën e vajzës së abuzuar, është shpërndarë nga kreu i qeverisë në faqen e tij në Facebook. Në fund të bashkëbisedimit me prindërit, të cilët duken në video me fytyrë, zëdhënësja e qeverisë u jep atyre porosinë e ‘Skënderbeut’ të saj.
“Ne duan ta ndihmomë deri në fund. E kam porosi këtë nga kryeministri që nëse vajza do dojë në ndjeki shkollë këtu, në kolegj apo do të shkojë jashtë, kudo që të jetë, do ta ndjekim për ti siguruar bursë dhe mbështetje që ajo të zhvillojë të gjithë potencialin e saj e pandikuar nga kjo ngjarje dhe jam e sigurt që do shkëlqejë, e sigurt. Është vajzë me shumë kurajo, është vajzë e shkëlqyer me nota, që ndjek gjuhë të huaja, që lexon dhe ne duam që të investojmë në shkollimin e saj”, është premtimi i Spiropalit me porosi të Ramës, i cili e gradoi disa muaj më parë zëdhënëse për qeverinë dhe Ministre Shteti për Marrëdhëniet me Parlamentin.
Përveç se i jep jehonë ‘zemërmirësisë’ së tij, Rama shkruan në komentin që shoqëron videon se “prindërit e vajzës ndihen të pambrojtur nga agresioni publik i politikës e medias dhe luten për respektimin e privatësisë së vajzës”. Dhe këtë e bën teksa shfaq me fytyrë prindërit e të miturës. A ka shkelje më të madhe të privatësisë?
Dhe, Zoti Kryeministër, a nuk do të ishte më mirë që të siguroni që institucionet arsimore të ruajë fëmijët e shqiptarëve nga abuzimet? Pastaj, ndoshta, nuk do të jeni ‘të detyruar’ që dështimin e shtetit ta ktheni në propagandë. Ndoshta pastaj, nuk do të jetë nevoja të bëni ‘njeriun e mirë’ dhe të premtoni bursa studimi për viktimat e krimeve kaq monstruoze.
https://streamable.com/dn5jg
