Autoritetet ruse kanë njoftuar se dyshohet që një grua është ngrënë për së gjalli nga derrat e fermës së saj. Besohet se gruaja 56-vjeçare ka pësuar sulm epileptik gjatë kohës kur po i ushqente kafshët.
Raportohet se gruaja ka pësuar kafshime të rënda në fytyrë, veshë dhe krahë, ndërsa ka ndërruar jetë për shkak të humbjes së gjakut. Ajo ishe gjetur në fermë nga burri i saj në rajonin e Udmurtias, në Rusinë perëndimore.
Ai kishte shkuar për të fjetur herët sepse nuk ndihej mirë, ndërsa gruan e gjeti të nesërmen. Agjencitë shtetërore të lajmeve nuk e kanë bërë të ditur numrin e saktë të derrave që ndodheshin në fermë.
Kjo nuk është hera e parë që një fermer hahet nga derrat e vet. Një fermer amerikan në shtetin e Oregonit ishte ngrënë nga derrat e vet në vitin 2012. Autoritetet i kishin gjetur pjesët e trupit të tij brenda rrethojës ku i ushqente derrat, shkruan “Independent”.
