Drejtori i Përgjithshëm i Burgjeve Stefan Çipa, është shkarkuar nga detyra. Çipa mësohet se është emëruar në krye të Entit Kombëtar të Banesave.
Ai qëndroi 5 muaj në postin e Drejtorit të Burgjeve pasi zëvendësoi Arben Çukon. Emërimi i tij erdhi ne 3 shtator të këtij viti, kur ministrja Etilda Gjonaj shkarkoi nga detyra Çukon, duke emëruar si drejtor të Përgjithshëm të Burgjeve në vend të tij, Stefan Çipën, ish zv.ministër i Brendshëm. Kujtojmë se me pas Çuko u arrestua në kuadër të operacionit “Vol-vo4”.
Ndaj tij u vendos masa e sigurimit “arrestit me burg” nga Gjykata e Krimeve të Rënda, por me kërkesë së palës së pandehur, masa u zbut në “arrest shtëpie” dhe ish-deputeti socialist la qelinë.
Ndërkohë, Çipa në zgjedhjet e vitit 1997 u zgjodh deputet i Kuvendit të Shqipërisë për herë të parë, duke vazhduar edhe për 2 legjislatura. Në muajin shkurt 2002, u emërua Ministër i Rendit Publik, detyrë që e ushtroi deri në muajin gusht 2002. Në zgjedhjet lokale të vitit 2011, Çipa u zgjodh Kryetar i Bashkisë së Sarandës, për një mandat 4-vjeçar.
Në datë 13 Janar 2016, u emërua nga Këshilli i Ministrave, zëvendësministër i Punëve të Brendshme.
