“Germania”, linja ajrore low-cost, me rreth 1.100 të punësuar dhe më shumë se 30 avionë të mesëm, ka shpallur falimentimin.
Kjo linje prej disa kohesh operon në Kosovë në linjat drejt destinacioneve të Parisit dhe Kopenhagenit.
Në tetor të vitit të shkuar, u mësua se Germania do të fillonte të operonte edhe në Shqipëri. Lajmi u bë i ditur asokohe për “Monitor” nga Dr. Rolf Castro-Vasquez, drejtor ekzekutiv (CEO) i Tirana International Airport. “Ata kanë interes për të fluturuar në disa rrugë drejt Gjermanisë”, pohoi ai.
Në faqen e internetit të kompanisë nuk u publikuan destinacionet dhe tarifat e fluturimeve drejt Tiranës, ndërsa pak ditë më vonë, linja ajrore me bazë në Zvicër Germania Flug bëri me dije se do nisë fluturimet nga Zyrihu në Tiranë verën e 2019
“Fatkeqësisht, nuk kemi arritur me sukses të kompletojmë përpjekjet tona financiare për të arritur likuiditetin e nevojshëm në afat të shkurtër kohor”, ka thënë drejtori i “Germanias”, Karsten Balke, në njoftimin e dhënë për shtyp.“Me shumë keqardhje, si pasojë, nuk kemi pasur zgjedhje tjetër, veçse të kërkojmë falimentimin”.
“Germania” ka bërë të ditur se ka paraqitur kërkesën për falimentim në Berlin të hënën në mbrëmje dhe të gjitha fluturimet janë anuluar menjëherë.
Por, bëhet e ditur se nga ky falimentim, nuk janë prekur “Swiss Germania Flug” dhe “Bulgarian Eagle”. Fluturimet me “Swiss Germania Flug” nga Zvicra drejt Prishtinës, Shkupit dhe Ohrit vlejnë sipas orarit të parashikuar por ende nuk ka asnjë njoftim për planet e kësaj vere për të nisur fluturimet me Shqipërinë.
