Emisioni ‘Top Story’ në TCH solli historinë e Safete Malajt, një e moshuar 77-vjeçare që qëndron në burg. Ajo ka bërë një krim në vitin 2005, ndaj vajzës së saj.
‘Unë ndodhëm këtu, kam bërë një gabim, kam plagosur vajzën time. Pa dashje, kam 13 vite që jam këtu brenda dhe vajza më vjen, qe pa dashje se nuk doja të vrisja vajzën time. Qëllova kot ndodhi plotë. Ky është gabimi im i parë në pleqëri. Mora bleva një pistoletë, atë ditë që e bleva bëra dasmën. Doja të provoja pistoletën, vajza po vinte dhe e goditi në sup. Ja kështu ka qenë. Nuk ka qenë me sherr’, – rrëfen Safete Malaj, e dënuar.
Për këtë krim të lehtë, e moshuara është dënuar rreth 3 vite e 6 muaj, por sot asaj i janë bërë plot 13 vite në burg. Edhe sikur gjykata të kishte dhënë dënim maksimal për të, pra 10 vjet burg, siç e parashikon Kodi Penal, sërish Safetja duhej të ishte jashtë burgu. Por ajo vijon dënimin. Arsyeja është shumë e thjeshtë. Një ngërç institucional për ta rehabilituar në azilin e pleqve, ka bërë që 77-vjeçarja të vazhdojë burgun, bashkë me 22 gra të sëmura mendërisht.
‘Unë dua të dal nga burgu dhe të shkoj në azil, është më mirë për mua, nuk dua të rri më këtu, unë nuk i kam bërë ndonjë dëm shtetit’, – tha Safete Malaj, e dënuar.
‘Ngërçi i Safetës është tek ligjet në fuqi. Safetja ka një vendim gjykate për mjekim të detyruar. Dhe që Safetja të dalë në jetë normale, duhet që të ketë garant një person nga familja, që të kalojë me mjekim ambulant. Por deri tani ne nuk kemi parë që ti vijë ndonjë njeri nga familja, dhe ngelet në spitalin e burgut sepse nuk ka një person që ti dalë garant. Nuk e di si do të funksionojë, ajo mund të rri shumë mirë në një azil pleqsh sepse nuk ka pasur ndonjëherë agresivitet’, – thotë Apostol Luca, Drejtor i Spitalit të Burgut.
Safetja është një nga rastet e pacientëve të rehabilituar. Pas krimit, e moshuara kaloi një fazë depresive, por sot ajo është rikuperuar plotësisht dhe sipas mjekëve nuk përbën rrezik.
‘Të marrim rastin hipotetik të Safetës, në një institucion civil, po të ishte e shtruar tek spitali psikiatrik, Safetja mund të dilte me mjekim ambulator, të jetonte normalisht si çdo i sëmurë tjetër’, – tha Mirjeta Gogaj, Psikiatre, Spitali i Burgut.
Safetja shërben si katalizator edhe për ruajtjen e qetësisë tek gratë e sëmura mendërisht. Por, për mjekët, Safetja nuk duhet të qëndrojë në spitalin e burgut, pasi gjendja depresive mund ti rikthehet si pasojë e kontaktit të vazhdueshëm me të sëmurët mendorë.
‘Nuk përbën rrezik për shoqërinë Safetja, ajo mund të jetë si çdo i moshuar tjetër që merr një mjekim ambulator jashtë’, tha Mirjeta Gogaj, Psikiatre, Spitali i Burgut.
Sot, e moshuara 77-vjeçare, është penduar për krimin e kryer 13 vite më parë.
‘Që kur e bëra atë gjest, unë vajta të pija helmin, por erdhën fëmijët dhe ma hoqën shishen’, tha Safetja.
Fëmijët e kanë braktisur. Nëse fëmijët do të pranonin të ëmën në shtëpi, atëherë Safetja lirohet menjëherë nga Spitali i Burgut. Por ata refuzojnë ta marrin, por i marrin vetëm pensionin.
‘Pensionin e marrin. Ua kam lënë se nuk jam nga ato nëna. Prej 13 vitesh unë marr pension të mirë’ – tha Safetja.
