Skënderbeu po mundohet të lërë pas krahëve problemet e hasura në ndeshjen e fundit në kampionat, ku regjistroi edhe humbjen e gjashtë radhazi. Bardhekuqtë duan që të harrojnë edhe atë që ndodhi para fillimit të takimit ndaj Kastriotit në Fushë-Krujë.
Për të bërë një gjë të tillë, trajneri Orges Shehi duket se kërkon nga ekipi i tij përqendrimin maksimal, duke filluar nga sfida e sotme e Kupës, ku të tijtë duhet të japin më të mirën, me qëllim vijimin e rrugëtimit për një nga objektivat e Skënderbeut.
Ndeshja e parë në Lezhë ndaj Besëlidhjes u fitua 1-2, por Shehi ka theksuar në konferencën e djeshme për shtyp se e rëndësishme është që ekipi të kalojë këtë tur dhe për këtë do të hedhë në fushë të gjithë lojtarët që kanë gjendje më të mirë fizike.
“Tani duhet të mendojmë për Kupën, pasi është një ndeshje e rëndësishme dhe mbi të gjitha një objektiv i Skënderbeut. Kemi marrë një rezultat pozitiv në ndeshjen e fundit dhe duhet të dimë të kalojmë këtë fazë. Të mos mendojmë për çfarë kemi bërë në takimet paraardhëse, por të përqendrohemi dhe të jemi të bashkuar vetëm te ndeshja e radhës”, theksoi fillimisht Shehi, ndërsa më pas u ndal të analizojë edhe dy largimet e fundit nga ekipi, të mbrojtësit Fidan Aliti dhe sulmuesit Ardit Hoxhaj.
“Janë dy largime që na vjen keq. Alitin e prisnim, pasi duke qenë pjesë e Kombëtares së Kosovës dhe një lojtar me cilësi, ishim të bindur se do të ndodhte kështu. Oferta për të ka pasur gjithë kohës dhe tani erdhi ajo e duhura që ai të largohej. Është një dëm që i bëhet organikës së ekipit tonë, por në bazë të politikave të klubit është i justifikuar, edhe për shkak të asaj që ndodhi me Europën.
Ndërsa Hoxhaj është larguar nga Skënderbeu në drejtim të një klubi tjetër për vetë faktin se kërkonte më shumë minuta në dispozicion. Shpresoj t’i gjejë atje ku do të shkojë”.
Bojkoti i kampionatit
I pyetur për deklaratën e klubit dhe të presidentit Takaj në lidhje me një bojkotim të mundshëm të kampionatit, Orges Shehi nuk ka pranuar të bëjë një koment për këtë, pasi sipas tij ai duhet të mendojë vetëm për atë që ndodh në fushë.
“Në lidhje me këtë çështje mund të them se unë jam trajneri i Skënderbeut dhe nuk më takon të komentoj deklaratat e presidentit. Unë duhet të mendoj për ndeshjen, pasi është shumë afër dhe jo të qaj atë që na iku, sepse nuk kthehet më. Dua edhe nga ekipi të njëjtën gjë, të kemi përqendrim maksimal në këtë takim te fusha mbi të gjitha. Janë drejtuesit e klubit ata që merren me atë çështje që ndodhën në Fushë-Krujë”, është shprehur kreu i pankinës.
Rekordi i humbjeve
Pas gjashtë humbjeve radhazi, Skënderbeu duhet të rikthehet te fitoret dhe kjo është më se normale, por krizës së korçarëve Shehi i përgjigjet edhe më mungesat që ka pasur në formacion, si dhe çështjen e fatit. Skënderbeu provën më të rëndësishme e ka pikërisht të hënën, kur për javën e 21-të pret Laçin.
“Rezultatet me të vërtetë kanë qenë jo të denja për Skënderbeun, por që do të bëjmë maksimumin të rikthehemi që këtë javë te fitoret. Sigurisht që në këto humbje kanë ndikuar shumë faktorë. Së pari, ekipi nuk ka qenë asnjëherë i plotë. Shpresoj që të jemi aty ku duhet dhe të rikthehemi te fitorja që në ndeshjen me Laçin në kampionat”, përfundoi trajneri i Skënderbeut. /Panorama Sport/
