Shitja e Fidan Alitit nuk i ka gëzuar të gjithë në Korçë. Veç të mirave financiare që klubi përfitoi në këtë rast, ai ka krijuar një “gropë” të madhe në prapavijë. Në momentet që flasim, Skënderbeu ka vetëm 4 mbrojtës të deklaruar, mes të cilëve dy luajnë në krahë dhe dy të tjerë në qendër.
Një situatë e tillë i çon në kufijtë e emergjencës, pasi ky repart është cunguar ndjeshëm dhe aktualisht kanë “zero” alternativa. Nëse në gjysmën e parë të sezonit kishte alarm për mesfushën, tashmë stafit teknik i shtohet stresi për mbrojtjen. Të gjitha problemet në këto momente kalojnë tek Orges Shehi, të cilit i mbetet për detyrë të eksperimentojë shumë gjatë pjesës së dytë të sezonit për të mbuluar “gropat” e mundshme që do të lerë largimi i Fidan Alitit. Kosovari, përveçse ishte një nga shtyllat e ekipit, çonte në 5 numrin e mbrojtësve për trajnerin.
RREZIKU
Tashmë nuk mbetet gjë tjetër, veçse të shpresohet në rikuperimin e shpejtë të Bruno Lulajt, që të ketë një opsion më shumë në rast rreziku (dëmtime qofshin apo penalizime prej të verdhëve). Nuk dihet sesi mund të mbulohet Orges Shehi në rast se në ndeshjen e radhës në kampionat do të mungojë një lojtar mes Marko Radasit dhe Kaba Sambout. Të dy këta futbollistë janë më të rrezikuarit për kartonë gjatë një takimi, nga vetë pozicioni që kanë në fushë.
Duke parë se edhe me mbylljen e merkatos së janarit nuk erdhi asnjë lojtar defensiv, krijuan përshtypjen se Aliti nuk do të largohej, por e kundërta ndodhi dhe tashmë gjithçka ka mbetur një “rebus” për ‘tu zgjidhur. Skënderbeu mbushi arkën me shitjen e një lojtari, por la një “gropë” në prapavijë që nuk dihet se si mund të mbushet. I takon tashmë trajnerit Shehi që të zgjidhë këtë dilemë dhe të eksperimentojë të paktën deri në fund të sezonit, se kush mund jenë futbollistët që do të sakrifikojnë për të luajtur si qendërmbrojtës.
ALTERNATIVAT
Për momentin, duke parë edhe çështjen e të huajve në fushë, duket se Skënderbeu ka një detyrim për të luajtur me katërshen që ka në dispozicion, konkretisht: Vangjeli-Radas-SambouAbazi. Ndërsa me kalimin e javëve, kur Bruno Lulaj të rikthehet në dispozicion pas dëmtimit do të jetë një alternativë më shumë për korçarët, që gjithsesi mbetet në emergjencë në këtë repart.
Shehi do të testojë nëse ndonjë nga të afruarit e janarit, me shumë mundësi Sibo, mund të shërbejë si një alternativë në mbrojtje apo jo. Gjithsesi, për ndeshjen e kësaj jave kundër Laçit, trajneri duhet të bëjë llogaritë vetëm me 4 mbrojtës në ekip dhe mundësi zgjedhjeje nuk ka. /Panorama Sport/
