Reagimi i parë zyrtar lidhur me ngjarjen e rëndë të ndodhur në Kavajë ka qenë krejtësisht i befasishëm. Sipas zëdhënëses së qeverisë Rama, Elisa Spiropali kjo ngjarje me gjithë problematikat e saj nuk ka asgjë për tu habitur.
Sigurisht që në gjuhën protokollare askush nuk pret që ministra e zv/ministra të ‘mallëngjehen’ por kjo nuk e zvogëlon e as nuk e zbeh aspak as përgjegjësinë dhe as rëndësinë e kësaj ngjarje dhe detyrimet që kanë institucionet lidhur me të.
Ajo u shpreh se raste të tilla ndodhin edhe në vendet më të zhvilluara dhe se policia ka nisur hetimet për rastin në fjalë.
“Është një rast tmerrësisht, i rëndë dhe duhet të hetohen dhe të vihen para ligjit të gjithë përgjegjësit. Nuk iu besoja syve kur lexova deklaratën e PD-së, që nuk nguron të përdorë raste të tilla për të bërë politikë.
Institucionet kanë reaguar menjëherë pas marrjes së denoncimit, dhe unë jam e bindur se edhe prokuroria do të kryejë hetimet e nevojshme.
Raste të tilla fatkeqësisht ndodhin dhe në vende të zhvilluara, bëhen edhe filma për raste të tilla të tmerrshme, po në asnjë nga këto vende forcat politike nuk dalin që të përdorin këto raste për interesat e tyre personale dhe të momentit”, tha Spiropali.
Nuk e dimë nëse në një vend të zhvilluar autoritetet dhe personat përgjegjës për një krim të tillë kaq makabër, do të qanin apo jo, por një është e sigurt; askush s’do të guxonte të buzëqeshte.
/Boldnews.al/
