Rreth një javë pas vrasjes së ish-punonjësit të policisë, Arben Bilali, policia ka mundur të gjejë automjetin, që dyshohet se është përdorur në atentat.
Automjeti tip Mercedes CLS me targa të vjedhura, u gjet e braktisur disa orë pas ngjarjes në periferi të kryeqytetit, jo shumë larg zonës së Selitës, ku 50-vjeçari u qëllua për vdekje me breshëri automatiku, raporton TCH.
Nga raportimet mësohet se automjeti është dërguar në laboratorin e Policisë Shkencore, ku po i nënshtrohet një ekzaminimi të detajuar.
Hetuesit shpresojnë që nga kjo procedurë të përfitohen të dhëna të vlefshme për vrasësit, si gjurmë gishtash, qime floku, apo mbetje të tjera që mund të çojnë në identifikimin e autorëve.
Pas krimit, policia ka marrë në pyetje disa persona, por mësohet se nuk janë siguruar të dhëna që mund të çonin në zbulimin e autorëve.
