Pedagogët dhe studentët janë bërë bashkë në kauzën e tyre për një arsim të mirë dhe cilësor. Ditën e sotme një grup studentësh dhe pedagogët së bashku me Unionin Gjermanë janë pritur në Ambasadën Gjermane.
Çështje kryesore që ata kanë diskutuar ka qenë ajo mbi protestën studentore dhe çfarë e solli krizën e madhe që ka mbërthyer universitetet.
Përfaqësues të Ambasadës Gjermane kanë treguar modelin e tyre universitar dhe kanë theksuar se qeveria shqiptare duhet të ketë prioritet arsimin dhe duhet të financojë më shumë për arsimin.
Një pikë tjetër e diskutimit është bazuar mbi kushtet e konvikteve pasi qeveria gjermane ka dhënë një fond prej 20 milion euro për konviktet dhe asgjë konkrete nuk është bërë me këto fonde.
Unioni Studentor Gjerman ka bërë një kërkesë për të parë më nga afër kushtet e konvikteve dhe akoma nuk kanë marrë një përgjigje zyrtare nga drejtoresha e konvikteve.
Pikë tjetër e rëndësishme ishte përfaqësimi i studentëve në vendimmarrje universitare, por theksi u vendos tek mos financimi i qeverisë në arsim.
Studentët janë shprehur se qeveria shqiptare ka para për të bërë 2 kilometra rrugë me shifra të frikshme dhe nuk investon në arsim.
Si përfundim ata u solidarizuan me qëndresën studentore dhe kërkesat e tyre bazike dhe dënuan dhunën e ushtruar ndaj studentëve.
