Në kohën kur opozita po denonconte skandalet e qeverisë Rama dhe ministrave të lidhur me krimin, kreu i PD-së, Lulzim Basha dhe deputetë të kësaj partie, janë mbajtur nën përgjim nga policia.
Deklarata është bërë nga deputeti demokrat Ervin Salianji, sipas të cilit ky përbënte një skandal të madh.
Sipas tij, forcat operacionale kanë mbajtur nën vëzhgim kreun e opozitës dhe deputetë të saj, fakte këto të denoncuara edhe nga mediat.
Gjithashtu Salianji, i pranishëm në emisionin “”5 pyetjet nga Babaramo”, foli edhe për dosjen “339”, për të cilën theksoi se janë disa zyrtarë të PS, përfshirë edhe kryebashkiakun e Durrësit, Vangjush Dako, në përgjimet e grupit të heroinës së Hasit, të implikuar në shit-blerjen e votave.
“Janë 10 zyrtarë të PS, të zbuluar nga përgjimet e grupit e heroinës së Hasit, të përfshirë në trafik droge dhe blerje votash për llogari, të kryebashkiakut të Durrësit, Vangjush Dako.
Në një përgjim të vetëm, kanë dalë nja 10 zyrtarë për drogë, blerje votash nga bandat me Vangjush Dakon në Durrës dhe Shijak. Vetëm këto janë bërë publike, por padiskutim që ka edhe dosje të tjera që janë kapur në përgjim zyrtarë të lartë të PS që flasin për shitblerje të votave.
Nëse do kishim gjyqësor dhe prokurori të pavarur do ishin arrestuar. Jemi në një situatë ku këtu këta persona që i kanë shërbyer Ramës për të ardhur në pushtet dhe për të mbajtur pushtetin, janë të lirë, nuk ka asnjë të arrestuar për shitblerje të votave.
Është dosja e Damian Gjiknurit e nxjerrë edhe nga PD. Basha e ka thënë që kemi informacion për këtë ish-ministër të përfshirë në shit-blerje të votave. Basha ka parë dosjen për Gjiknurin. Por sot përgjimet po i publikon edhe një institucion prestigjioz që do të thotë se niveli i alarmit ka tejkaluar shqetësimet e Shqipërisë, siç është “Zëri i Amerikës””, tha Salianji.
