Një operacion i policisë së Elbasanit i koduar “Zaranika”, ka arrestuar një person pasi i është gjetur 1 minë me telekomandë dhe një sasi droge.
Burime zyrtare bënë me dije se operacioni i kryer nga specialistët e seksionit për Hetimin e Narkotikëve dhe Trafiqeve të Paligjshme në Drejtorinë e Policisë së Elbasanit, çoi në ndalimin e A.R. (Adriatik Ramaj) është mbi bazën e informacioneve të marra në rrugë operative, pas një hetimi me metoda speciale.
“Në vijim të punës për parandalimin dhe goditjen e personave që tentojnë të trafikojnë lëndë narkotike apo lëndë plasëse, mbi bazën e informacioneve të marra në rrugë operative, pas një hetimi me metoda speciale, Specialistët e Seksionit për Hetimin e Narkotikëve dhe Trafiqeve të Paligjshme kanë organizuar dhe finalizuar operacionin policor të koduar ‘Zaranika’, ku u arrestua në flagrancë shtetasi A.R.
Shërbimet e Policisë gjatë kontrollit të ushtruar në qytetin e Elbasanit i kanë gjetur këtij shtetasi 1 minë me telekomandë, si dhe rreth 7 kg lëndë narkotike e llojit kanabis, të cilat u sekuestruan në cilësinë e provës materiale.
Në bashkëpunim me Prokurorinë vijon puna për zbardhjen e plotë të këtij rasti, identifikimin dhe kapjen e personave të tjerë të implikuar. Materialet në ngarkim të tij i kaluan Prokurorisë pranë Gjykatës së Shkallës Parë Elbasan për veprat penale të ‘Prodhimi dhe mbajta pa leje e armëve luftarake dhe e municionit’ dhe ‘Prodhimi dhe shitja e narkotikëve’”, njoftoi Policia. /BN/
