Ekskluzive/ Skandal me Aviacionin Civil, paguan 13 mijë euro qira mujore për ambientet në Fushë-Prezë

Nga Boldnews.al

Ish-ministri i Infrastrukturës dhe Energjitikës Damian Gjiknuri, para se të linte karrigen e postit të lartë, la pas edhe një skandal më të fundit në tarifat e larta të qiramarrjes për institucionet në varësi të tij. Bëhet fjalë për ambientet e reja të Autoritetit të Aviacionit Civil, që do të zhvendosen nga zona e ish-Bllokut të Tiranë, drejt Fushë-Prezës, për një vlerë mujore prej 13.256 euro.

Marrëveshja e lidhur mban datën 19, 11, 2018 mes drejtorit të Autoritetit Civil, Krislen Keri (në rolin e qiramarrësit) dhe të shtetases gjermane Stephanie Sieg, si qiradhënëse. Ambienti që së fundmi akomodohet Autoriteti i Aviacionit Civil sipas të dhënave të kontratës, ndodhet në godinën “Tirana Business Park” në Fushë Prezë.

Përtej shifrës mjaft të lartë të qirasë mujore, që lidhet me largësinë nga pjesa urbane e Tiranës, aktualisht ky institucion i ka ambientet e saj në adresën: Rruga: “Sulejman Delvina”, P.O. Box 205, Tiranë, Shqipëri, me vendndodhje në një nga zonat më të preferuara të Tiranës në ish-Bllok.

Në një marrëveshje të dyshimtë qiramarrje ambientesh, Autoriteti i Aviacionit Civil pas 12 ditësh, në bazë të kontratës së re do të zhvendoset në një “zonë rurale”… Skandali merr përmasa më të mëdha edhe për nga metrat katrorë që ofrohen. Bëhet fjalë për 973 metra katrorë ambiente zyrash dhe 14 metra katrorë magazinë. Nëse kërkohet në agjencitë imobiliare mund të gjenden lehtësisht deri në 5 mijë euro mujore ambiente të tilla në zonat e preferuara të Tiranës.

LEXO EDHE  Zaev: Duam Datën dhe jo anëtarësimin e menjëhershëm

Duke iu referuar kontratës, që Boldnews.al e ka siguruar ekskluzivisht, është e përcaktuar se afati i qiramarrjes bëhet i efektshëm më datë 15.02.2019. Afati i qirasë së kontratës do të jetë i plotë për dy vite, duke e çuar shpenzimin vetëm për zyra në 318 mijë euro në total.

Paratë publike në këtë rast do të justifikohen për qiramarrje ambientesh zyrash për institucionet shtetërore. Ndonëse ka vend për hetim të thelluar dhe auditim, tashmë kontrata është nënshkruar dhe ka marrë vlerë ligjore dhe nuk mund të kthehet pas.

Si person juridik kontrata është nënshkruar nga Drejtori i Autoritetit të Aviacionit Civil Krislen Keri, i cili e ka marrë emërimin më datë 10.11.2017 me propozim të Ministrit të Infrastrukturës dhe Energjitikës Damian Gjiknuri dhe me miratim nga Kryeministri Edi Rama.