Pedagogët e Fakultetit të shkencave Sociale pritet të nisin grevën ditën e nesërme, në shenjë revolte ndaj qeverisë, që injoroi kërkesat e tyre.
Përmes një njoftimi, bëhet me dije se, në Asamblenë e personelit akademik të FSHS, pro grevës kanë votuar thuajse të gjithë pjesëmarrësit, 36 nga 38 vetë. “Çka do të thotë se vendimi i saj për grevë është i detyrueshëm ligjërisht edhe për ata që kanë votuar kundër, edhe për ata që nuk janë paraqitur në asamble, edhe për pedagogët e jashtëm. Kush shkel grevën, shkel ligjin, statutin e UT dhe etikën pedagogjike”, thuhet në njoftimin e Asamblesë së Pedagogëve të Shkencave Sociale.
Një apel, akademikët i bëjnë edhe studentëve: “U bëjmë thirrje studentëve të solidarizohen me pedagogët, të cilët do të mblidhen të hënën në orën 8 në oborrin e Fakultetit të Shkencave Sociale”.
Pak ditë më parë, pedagogë të Universitetit të Tiranës, në përfundim të një asambleje, dolën me disa kërkesa ndaj qeverisë dhe një afat kohor. Nëse kërkesat nuk plotësohen brenda afatit, paralajmëruan akademikët, atëherë do të futeshin në greve.
https://boldnews.al/2019/01/25/asambleja-e-pedagogeve-del-me-6-kerkesa-dhe-nje-ultimatum-qeverise-keni-1-jave-kohe-perndryshe/
Qeveria zgjidhi injorimin e kërkesave të shtruara nga ata dhe tanimë akademikët duket të vendosur për të mbajtur premtimin.
NJOFTIMI I ASAMBLESË SË PEDAGOGËVE TË FSHS
“TË HËNËN GREVË
Faqja e Fakultetit të Shkencave Sociale ka postuar dy dokumente në kundërshti me njëra-tjetrën. Në fillim shpallet vendimi për grevë i asamblesë së personelit akademik, pastaj një skemë e rifillimit të mësimit, a thua se nuk ka grevë.
Na del detyra të sqarojmë se, sipas logjikës së shëndoshë dhe statutit të Universitetit të Tiranës, asambleja e personelit akademik është organi më i lartë vendimmarrës i një fakulteti. Kjo asamble zgjedh rektorin, dekanin dhe anëtarët e senatit akademik, si dhe u kërkon llogari të zgjedhurve për mënyrën se si ushtrojnë detyrën.
Asambleja e personelit akademik të FSHS është mbledhur në respektim të nenit 45, pika 3 të statutit të UT. Pro grevës kanë votuar jo vetëm thuajse të gjithë pjesëmarrësit në asamble, 36 nga 38 vetë, por edhe shumica absolute e pedagogëve të Fakultetit të Shkencave Sociale (gjithsej 71 vetë, duke përfshirë këtu pedagogët që nuk morën pjesë në asamble). Çka do të thotë se vendimi i saj për grevë është i detyrueshëm ligjërisht edhe për ata që kanë votuar kundër, edhe për ata që nuk janë paraqitur në asamble, edhe për pedagogët e jashtëm. Kush shkel grevën, shkel ligjin, statutin e UT dhe etikën pedagogjike.
U bëjmë thirrje studentëve të solidarizohen me pedagogët, të cilët do të mblidhen të hënën në orën 8 në oborrin e Fakultetit të Shkencave Sociale!”
/Boldnews.al/
