E detyruar të mashtrojë / Falsifikoi dokumentat që të mos e martonin me mblesëri

Një tjetër rast i tmerrshëm lidhur me abuzimin dhe diskriminim e femrave shënohet në Shqipëri. Një histori si shumë e shumë të tjera, që dëgjohen rëndomë në kafene, por që mbeten të pabesueshme për sa kohë nuk i përjeton në kurriz.
Daniela Prenga është vetëm një nga qindra e mbase mijra vajza të reja që detyrohen të mashtrojnë, të shpifin e t’ja mbathin sa më parë nga Shqipëria vetëm për të mos iu bindur rregullave shtypëse të kësaj shoqërie.
Që në moshë fare të re familjarët i ushtronin presion se do ta martonin pa dëshirën e saj me një burrë shumë më të madh se ajo në moshë e që as e njihte. Frika dhe paniku për të ardhmen e saj e detyruan që të merrte vendimin drastik; të largohej nga Shqipëria me cdo kusht.
Kështu ajo me një pasaportë fallco u largua nga Shqipëria drejt Britanisë së Madhe. Ajo shkoi fillimisht në Hungari, ku u pajis me një pasaportë false. Identiteti ishte i rremë, por fotografia dhe shenjat e gishtave ishin të Daniela Prengës. Avokati i shqiptares argumentoi se 26-vjeçarja rrezikon nëse do të kthehet në Shqipëri, ndërsa në Britani ka krijuar tashmë edhe familjen e saj.
26-vjeçarja aktualisht është e martuar dhe ka një fëmijë 2 vjeç, ndërsa është në pritje të fëmijës së dytë. Avokati i Danielës ka thënë se ajo rrezikonte të dhunohej në Shqipëri. Një burrë në moshë ishte projektuar për t’u bërë bashkëshorti i saj, martesë të cilën Daniela e refuzonte. Dhe e vetmja mënyrë për ta bërë këtë, ishte të braktiste vendin e saj. Ajo ishte dëbuar njëherë nga Anglia, por ishte rikthyer në vitin 2016 me pasaportën false.
Pasi shqyrtoi rastin e saj, gjykata vendosi dënim 90 ditë punë në komunitet për Daniela Prengën.