Trembëdhjetë persona, të akuzuar si pjesë e një grupi italo-shqiptar me bazë në Viterbo që merrej prej disa vitesh me aktivitete kriminale, kërkojnë lirinë.
Disa ditë më parë, një operacion i autoriteteve ligjzbatuese italiane i koduar “Erostrato”, çoi pas hekurave 13 persona shqiptarë dhe italianë, ndaj të cilëve u ekzekutuan nga policia, masat e arrestit me burg dhe arrestit shtëpiak, dhënë nga prokuroria dhe firmosur nga gjykata.
Mediat italiane raportojnë se avokatët e të ndaluarve, kanë kërkuar zbutjen e masave të sigurisë. Kërkesat nga mbrojtja janë bërë ditën e shtunë.
Të ndaluarit
Giuseppe Trovato, Ismail Rebeshi, Spartak Patozi, Sokol Dervishi, Gazmir Gurguri, Gabriele Laezza, Fouzia Oufir, Martina Guadanjo, Luigi Forieri, Shkëlzen Patozi i njohur si Zeni (vëllai i Spartakut), Ionel Pavel, Manuel Pecci, Emanuele Erasmi.
Hetimet
Akuza ndaj tyre janë pjesëmarrje në organizim të strukturuar mafioz, zhvatje e kërcënime të dhunshme, tentativë grabitje, dhunim fizik ndaj personave, armëmbajtje pa leje, etj.
Ky grupim kriminal, nën drejtimin e shqiptarit Isamil Rebeshi i cili njihej me nofkën Ermal e të italianit, Giuseppe Trovato i thirrur Peppino, anëtar i një prej klaneve të mafias kalabreze Ndrangheta, kishte terrorizuar sipërmarrësit dhe banorët e Viterbos.
Arrestohet grosisti shqiptar, furnizoi me dogra të forta organizatën e fuqishme në Itali (FOTO)
Me anë të metodave mafioze ata kishin vënë nën kontroll këtë territor për trafikimin e lëndëve narkotike si dhe kishin përvetësuar me metoda të dhunshme disa sektorë të ekonomisë si bizneset e shitje-blerjes së flororit si dhe disa lokale nate.
Hetimet e policisë italiane kanë nisur në dhjetor të 2017 e kanë vërtetuar mbi 50 episode të dhunshme të kryera nga ky grupim si kërcënime ndaj sipërmarrësve të zonës, djegie makinash mes të cilave dhe automjetet e dy punonjësve të policisë, letra kërcënuese me jetë e koka kafshësh të prera të hedhur në dyqanet e tregtarëve që nuk pranonin të paguanin.
Shqiptari Ismail Rebeshi sipas mediave italiane është i njohur nga policia vendase e me disa precedentë penalë në trafikun e drogës.
Ai është arrestuar për herë të fundit në nëntor të 2018 me akuzën e trafikut të mbi 85 kg heroinë e kokainë nga Siria e Shqipëria drejt Italisë. /Boldnews.al/
