“Një ngjarje historike”, e cilësoi Ministri i Brendshëm Sandër Lleshaj, hapjen e aplikimit për studentët, që duan ti bashkohen Policisë së Shtetit. Por, nisma ka shkaktuar pakënaqësi në radhët e punonjësve të institucionit ligjzbatues.
Sipas ndryshimeve ligjore të kërkuara nga Lleshaj dhe të miratuar nga parlamenti me votat e mazhorancës, parashikohet që studentë të drejtësisë, ekonomisë dhe shkencave kompjuterike me mesatare studimesh (bachelor apo master) mbi 8, nëse zgjidhen fitues, marrin automatikisht gradën “nënkomisar” pas përfundimit të Akademisë.
Ndryshimet ligjore, vetë ministri i quan “hapje të policisë”. Megjithatë, në radhët e këtij institucioni kjo shihet me mjaft kriticizëm.
Arsyeja e parë lidhet me zhvleftësimin e procedurave për marrjen e gradës nënkomisar. Aplikantët që dalin fitues, pas përfundimit të një kursi disa mujor në Akademinë e Policisë, marrin automatikisht gradën nënkomisar.
Para ndryshimeve ligjore, kjo nuk ishte kaq e thjeshtë. Sipas ligjit për Policinë, studentët që përzgjidheshin dhe ndiqnin Akademinë e Policisë, pas përfundimit të studimeve, merrnin gradën inspektor. Më tej, duhej që një efektiv të kalonte një periudhë 5-vjeçare në detyrë dhe më pas ti nënshtrohej një konkursi. Nëse rezultonte fitues, në përfundim të studimeve që zgjasnin tri vite, merrte gradën nënkomisar.
Tanimë, i gjithë ky mund për të marrë gradën nënkomisar, që punonjësve të policisë u është dashur vite punë për ta arritur, është hedhur poshtë me një ndryshim ligjor.
Por, ka më tepër se kaq. Një tjetër revoltë lidhet me pamundësinë e punonjësve aktual të policisë që përmbushin kriteret, për të aplikuar për marrjen e kësaj grade, përmes konkursit të ri. Kjo, pasi konkursi është i hapur vetëm për studentët dhe jo pjesëtarë të policisë.
Pra, ata punonjës policie që janë me gradën inspektor, të vetëm mënyrë që kanë për të aplikuar për marrjen e gradës nënkomisar përmes këtij konkursi, është të kërkojnë lirimin nga detyra. Vetëm pas kthimit në civil, kanë të drejtë të aplikojnë.
Një tjetër pikëpyetje mbi ndryshimet në ligjin për Policinë është qëllimi i tij. Brenda policisë ka dyshime se ky ligj po bëhet për interesa të ngushta të vetë ministrit apo personave pranë tij, të cilët duan ti bëjnë ndere njerëzve të tyre, për ti dhuruar një gradë me pak mund dhe më pas një punë komode në Polici. /Boldnews.al/