Bashkia e Beratit ka marrë disa masa për mbrojtjen e lagjes muzeal të “Mangalemit” e cila rrezikohet nga shëmbja e shkëmbinjëve në të cilin ajo është ndërtuar. Bashkia ka hartuar dhe një project për mbrojtjen e kësaj lagje historike dhe projektin ja ka dërguar Instituti të Monumenteve.
Lagja muzeale e këtij qyteti vazhdon të jetë në rrezik nga shkëmbinjtë mbi të cilët ajo është ndërtuar.Rastet kur massive shkëmbore janë shkëputur nga faqja kodrinore dhe kanë rrezikuar banesat muzeale por jo vetëm por edhe kalimtarët dhe automjetet nuk kanë qenë të pakta.
Situata mbetet alarmante ndërsa Bashkia për të shmangur incidentet ka rrethuar prej disa ditësh me shirita zonën dhe ka ndaluar parkimin e automjeteve në këtë zonë.
Kryetari i Bashkisë, Petrit Sinaj, thotë se i është dërguar një shkresë Institutit të Gjeologjisë dhe po hartohet një plan i detajuar masash.
“Si Bashki po marrim masa për parkimet që janë në këtë zonë ku bien shkëmbinjtë, projekti kur të jetë i detajuar do ti kërkojmë ndërhyrje qeverisë shqiptare që me fondet e veta të krijojnë një siguri për këtë pjesë të rrugës por edhe pjesën e zonës së banuar.
I kemi dërguar një shkresë Institutit, kanë ardhur dhe e kanë parë specialistë të fushës, po hartojnë një projekt të detajuar. Kemi qenë në kordinim dhe Ministrinë e Kulturës.”shprehet Petrit Sinaj për Oranews.
Sinaj shprehet se situata është rënduar për shkak të kalimit në rrugë të mjeteve me tonazh të rëndë, për të cilat Bashkia ka reduktuar oraret por nuk mund të pengojë dot bllokimin e aktiviteteve të qyteteve Poliçan e Skrapar, pasi kjo është e vetmja rrugë lidhëse mes qyteteve.
