Nga Mariana Koçeku
Të ecësh çdo ditë drejt universitetit me qëllimin e dijes është diçka shumë e mirë, por të ecësh drejt protestes studentore në emër të lirisë qëndron mbi të gjitha. Aty ku zëri yt bëhet një me zërin e mijërave përreth, kupton se cfare ndjesie është të luftosh në emër të lirisë dhe të mijërave ëndrrave të plagosura që ngrejnë zërin me shpresën e shërimit.
Në sytë e studentëve kishte dritë, dritë që kërkonte të depërtonte errësirën. Çdonjëri kishte ëndrrat e veta. Durimi ishte plakur dhe nuk duronte më disa nga pedagoget e babëzitur që i vëne shkelmin dijes, moralit dhe etikës.
Nuk jetohet më me ëndërrat e mbetura në sirtar për tu bërë dikushi në vendin tënd pa qenë nevoja të arratisesh. Ku studentët e konvikteve jetojnë të marrë peng në skutat e errësires, ku ditët studentore duken shumë të gjata dhe nganjëherë të pafundme. Leksionet duken të pambarueshme nga i ftofti që të mbërrin gjer në palc. Kur padrejtësia bëhet ligj, rezistenca bëhet detyrë! Në zemrat e secilit rreh nga një ëndërr mjeku, inxhinieri, politikani të ardhshëm, filozofi, historiani, arkitekti dhe shumë të tjera. Dëshira për arsimin nuk mungon por ajo të kthehet në mallkim nga disa pedagoge te pangopur dhe burokrat që në vend që të të shtojnë dëshirën për dijen, ta shkatërrojnë atë.
Studentët ëndërrojnë ti japin fund poshtërimeve, shkeljeve, makutërisë dhe paragjykimeve. Endërra për ti dhënë fund padrejtësive të panumërta dhe etheve që përjetohen midis mureve universitareve. Unë e përjetova këtë protestë mes lodhjeve dhe kenaqesive. Kenaqësi kur shikon forcën e madhe të rinisë dhe dëshirën e madhe për ndryshim dhe një Shqipëri më të mirë bazat e së cilës ndërtohen mbi një arsim të mirë.Zëri i shpresës u degjua me fort se kurrë.
Kjo ishte ëndrra e shumpritur, një ëndërr që pret të bëhet realitet. Një ëndërr për liri, pa shtypje! Një ëndërr për barazi, pa diskriminim! Një ëndërr pa propaganda, një vend ku veprohet dhe e ardhmja nuk mbahet peng.
Një protestë e mbetur peng midis ëndrrës dhe realitetit. Shpresat që zgjoi, presin që të triumfojë. Endërr që vlen sa njëmijë realitete te tjera, të përditshmes. Një ëndërr ë denjë për tu bërë realitet!
