Një ngarkesë prej 650 kg kokainë, e gjetur pak kohë më parë brenda një kontenieri me kafe në portin e Livornos, ka bërë që autoritetet italiane të zbulojnë aktivitetin e një organizate të specializuar në trafikun ndërkombëtar të drogës, pjesë e së cilës ishte edhe një shqiptar.
Bëhet fjalë për 31-vjeçarin Dorian Petoku, i cili u arrestua dje në Tiranë, në kuadër të operacionit ndërkombëtar të koduar “Brasile Low Cost”, që u zhvillua njëkohësisht në Itali dhe Shqipëri. Në operacion, përveç Policisë italiane dhe asaj shqiptare, morën pjesë edhe DEA amerikane dhe Policia zvicerane.
“Seksioni për Hetimin e Narkotikëve në Drejtorinë Vendore të Policisë Tiranë, në bashkëpunim me Interpol Tirana dhe Forcën e Posaçme Operacionale të Policisë së Shtetit, pas informacioneve të marra në rrugë operative, kapën dhe arrestuan përkohësisht shtetasin shqiptar, të shpallur në kërkim ndërkombëtar, D.P. 31 vjeç, nga Tirana. Gjykata e Romës, Itali, ka vendosur ndaj tij masën e sigurisë ‘Arrest në burg’, për veprat penale ‘Organizatë kriminale me qëllim trafikimin e lëndëve narkotike’”, tha dje zyrtarisht Policia e Shtetit.
Sipas mediave italiane, që u referohen burimeve policore atje, mësohet se shtetasi shqiptar, Dorian Petoku, në bashkëpunim me një shtetas malazez të arrestuar në Itali, kishin kontakte me shtetasit brazilianë për të gjetur sasi tjetër kokainë. Bëhet fjalë për një sasi prej 7 tonësh kokainë, që fillimisht ngarkohej në avion privat me nga 1 ton dhe transportohej në Itali.
OPERACIONI
Agjentë të infiltruar në bashkëpunim me Guardia di Finanza, Policinë zvicerane dhe DEA-n amerikane u hodhën në sulm për të kapur një sasi rekord droge, 7 ton kokainë e pastër me një vlerë prej 10 milionë eurosh, e destinuar për tregun italian. Kjo sasi nuk u arrit të shpërndahej, pasi organizata me 5 anëtarë u shkatërrua falë operacionit të koduar “Brasile Low Cost”. Kaq elementë do të ishin të mjaftueshme, sipas mediave italiane, për një skenar filmi me narkos në Amerikën Qendrore apo Jugore, e gjithçka mund të merrte spunto nga vetë realiteti.
Bëhet fjalë për një organizatë ndërkombëtare droge, 5 anëtarët e së cilës janë tashmë pas hekurave. Kreu i organizatës konsiderohet italiani Salvatore Casamonica 43 vjeç, tashmë në burg me regjimin “416 bis”, bashkë me të personi që e strehonte, Silvano Mondolesi dhe dy persona të rrezikshëm, një shqiptar, Dorian Petoku, 31 vjeç dhe një malazez, Tomislav Pavlovic, 40 vjeç që merreshin me transportin e mallit.
Pjesë e grupit është edhe një tjetër shtetas italian që, me sa duket, priste mallin në Itali. Marcello Schiaffini, 53-vjeç, mësohet të jetë lënë në masën “arrest shtëpie”. Mbi të pestë anëtarët e grupit rëndon akuza e trafikut ndërkombëtar të kokainës.
Shqiptari
Emri i Dorian Petokut, shtetasit shqiptar që u arrestua dje në Tiranë, siç thonë mediat italiane, ka dalë në hetime të shumta kundër trafikut të drogës. Ai konsiderohet gjithashtu si njeriu që ka strehuar trafikantin e njohur Arben Zogu, bashkëkombës i tij, i cili aktualisht vuan dënimin në burgun e Spoletos.
