Prestigjozia austriake ‘Der Standard’ i ka kushtuar një shkrim kryeministrit Edi Rama, në të cilën trajtohet dhe ‘ndikimi’ i tij për ndarjen e kufijve të Kosovës.
Gazetarja e ‘Der Standard’ për Ballkanin, Adelheid Wölfl, në artikullin e saj shkruan se mbështetja për përcaktimin e kufijve vjen nga ‘ nacionalistët shqiptarë dhe serbë që kërkojnë zona etnikisht homogjene, domethënë Shqipëria e Madhe dhe Serbia e Madhe, por edhe nga presidentët nacionalistë të Serbisë dhe Kosovës, Aleksandar Vuçiç dhe Hashim Thaçi, si dhe Kryeministri shqiptar Edi Rama.’
Më tej, gazetarja Wölfl shkruan se Rama ka lehtësuar kufijtë mes Shqiërisë dhe Kosovës, përveç disa kontrolleve të pakta, por ka nxjerrë nga qeveria e tij njeriun që kundërshtoi idenë e shkëmbimit territorial: ministri i Jashtëm Ditmir Bushati.
“Për këtë, Rama donte ta dorëzonte zyrën tek Gent Cakaj, 26 vjeçar, të cilin e pengonte presidenti shqiptar Ilir Meta. Zyrtarisht, Rama tani është zgjedhur vetë minister i Jashtëm, Cakaj është zëvendësi i tij – por të gjitha kompetencat i janë dhënë nga Rama. Për ekspertin e Evropës Juglindore, Florian Bieber nga Universiteti i Grazit, zëvendësimi i Bushatit është “befasues” dhe “i çuditshëm”, pasi ai ishte shumë i respektuar ndërkombëtarisht dhe kishte vepruar si një antipodë e qetë në vend. Bieber ankohet për “gjestet nacionaliste” të Ramës, të tilla si emërimi i shqiptarit të Kosovës Cakaj dhe thjeshtimi i kontrolleve kufitare mbi Kosovën’, shkruan artikulli.
Gjithashtu, eksperti Florian Bieber i ka thënë gazetares se ‘gjestet nacionaliste’ të Ramës janë sinjale për BE, për tju treguar se nëse integrimi nuk përparon, mund të ndodhë një bashkim gradual i territoreve shqiptare.
‘Ato (gjestet) përforcojnë udhëheqjen e Ramës mbi shqiptarët në Kosovë dhe Maqedoni, e cila dërgon një mesazh në BE: nëse integrimi në BE nuk përparon, ekziston një Plan B, bashkimi gradual i territoreve shqiptare, veçanërisht Shqipërisë dhe Kosovës’, shton Bieber.
