Nga Ëngjëll Musai
“Në varreza sado lule të ketë, nuk ka kurrë pranverë” do të thoshte publicisti i shquar italian Andrea G. Pinketts. Dhe kjo shprehje më shumë se kurrë i shkon për shtat pikërisht lëvizjeve të disa ministrave, të cilët përfliteshin prej ditëve dhe shkak për këtë, janë protestat e studentëve që sapo kanë filluar dhe që do vazhdojnë deri në plotësimin e kërkesave të tyre të ligjshme ekonomike, por edhe rikthimit të dinjitetit të auditorëve universitarë të nëpërkëmbur keqas nga arroganca, vulgariteti dhe babëzia e “rivjedhësve”. Por ky kabinet nuk meriton vetëm shpërbërjen, por mbi të duhet të nisë menjëherë vettingu dhe pas vettingut meriton të magazinohet për skrap në biruca dhe qeli.
Spostimet selektive të kreut të Qeverisë Rama, tashmë nuk mund t’i kapërdijnë qytetarët shqiptarë, pasi ky kabinet me në krye kryeministrin Rama janë figura te konsumuara, për rrjedhojë; si ata që u larguan edhe këta që erdhën janë figurantët e radhës.
Është fakt që kjo qeverisje është bërë si puna e gomoneve që fusin ujë nga të gjitha anët dhe timonieri i saj i dehur nga avujt e hashashit po qëndron me shpresën për ta braktisur i fundit. Ndaj dhe kombi shqiptar është “i mbetur në klasë” gjatë gjithë historisë, sepse është përfaqësuar nga mediokriteti dhe interesa pragmatiste lavdie individuale, duke e lënë vendin jashtë dyerve të BE-së.
Madje plaga është mahisur dhe pasojat vijnë nga grabitja e zgjedhjeve me çdo çmim dhe çdo mjet. Ndaj dhe qeveria është pasqyrë e Kuvendit që është kthyer në shtrat të hajdutëve, moralistëve, kriminelëve e xhepistëve, pa kulturë e përgjegjësi.
Gjynah andej nga vijmë, fatkeq ku po shkojmë! Por ajo që mund të jetë më skandaloze në këtë palo kabinet ka të bëjë me emërimin e ministrit të ri të Punëve të Jashtme dhe Evropës.
Një adoleshent pa përvojë dhe mbi të gjitha një ushtar i bindur i kryeministrit. Ndoshta kreu i qeverisë emërimin e tij e ka parë si shenjë të “patriotizmit”, duke harruar shprehjen e famshme të shkrimtari anglez, Samuel Johnson, i cili thoshte më 1775 se: “Patriotizmi është streha e fundit e maskarenjve! ” Po pse pak figura ka e majta për të vendosur në poste kaq delikate sikurse është portofoli i diplomacisë?! Sigurisht që ata nuk i duhen Ramës, pasi këtij të fundit i duhet një person që të mbyllë qarkun midis Thaçit-Vuçiçit dhe Ramës.
E megjithatë ajo që është më kryesorja ka të bëjë me faktin se, Rama nuk mund ta kapërdijë kollaj bisedën midis Bushatit dhe Sekretarit amerikan Mike Pompeo, duke anashkaluar kryeministrin Rama, i cili tashmë njihet si i besuari i Erdoganit. Në këtë aspekt do të dëshironim që ky shkarkim të mos jetë i lidhur edhe me qarqet antishqiptare dhe politikat e tyre sllave dhe turke si shenjë e miqësisë dhe besimit midis Bushatit dhe Mike Pompeo-s.
