Nga Boldnews.al
Vendimi i kryeministrit Edi Rama për largimin e Ditmir Bushatit nga posti i Ministrit të Jashtëm shkaktoi habi jo vetëm në Shqipëri, por edhe në median ndërkombëtare. “Zëri i Amerikës” dhe DWelle e raportuan me doza pikëpyetjeje vendimin e kryeministrit shqiptar për lëvizjen e Bushatit dhe zëvendësimin e tij me një anonin në diplomaci, por edhe në politikë.
Edi Rama e ka për natyrë që të mos flasë publikisht për arsye e vendimeve të tij, sidomos kur ato janë drastike, si në rastin e Bushatit, të cilin e trajtoi me largimin nga puna, njëlloj si me ministrat e tjerë, të goditur nga skandale korruptive.
Analistë dhe diplomatë të ndryshëm ngrenë dyshimin se lëvizja e Bushatit nga detyra lidhet me qëndrimin e tij kundër marrëveshjes ndërmjet Hashim Thaçit dhe Aleksandër Vuçiç për “korrigjimin e kufijve Kosovë-Serbi”, projekt i cili për shumë njerëz është thjesht dhe vetëm një “shkëmbim territoresh”.
Pjesa më e madhe e politikës kosovare, e cila e kundërshton projektin Thaçi-Vuçiç, është e mendimit se pas idesë së shkëmbimit të territoreve qëndron fondacioni i multimiliarderit Xhorxh Soros.
Në Shqipëri, idea e “korrigjimit të kufijve”, pra shkëmbimit të territoreve Kosovë-Serbi, mbështetet nga Baton Haxhiu, kryekëshilltar i kryeministrit Edi Rama. Haxhiu është gjithashtu personi që i ka sugjeruar analistin riosh kosovar, Gent Cakaj, për t’u emëruar në postin e kryediplomatit shqiptar.
Djaloshi 28-vjeçar, i panjohur totalisht në arenën politike dhe diplomatike, është produkt i “akademisë” Soros. Ai ka shërbyer në projekte të ndryshme të KFOS (Fondacioni Shoqëria e Hapur për Kosovën-Soros).
Soros në Kosovë konsiderohet si “kumbari” i shkëmbimit te territoreve. Në Shqipëri, mbështetësi kryesor i kësaj teze, Baton Haxhiu, i sugjeron Ramës për të emëruar Ministër të Jashtëm një “pinjoll” Soros-i. Ky “pinjoll” do të ulet në postin e Ditmir Bushatit, i cili e ka kundërshtuar tezën e “korrigjimit të kufijve”, e cila besohet se është “shkëmbim territoresh”.
Pra, Edi Rama vendosi të largojë nga qeveria e tij diplomatin, i cili kundërshtonte planin Thaçi-Vuçiç, duke emëruar një “vartës” të Baton Haxhiut, këshilltarit që mbështet fuqishëm korrigjimin e kufijve në Kosovë, sipas projektit të mbështetur nga Soros.
Lëvizja e Bushatit dhe hija e Soros-it duket se janë të pashmangshme. Burime konfidenciale konfirmojnë se të premten e kaluar, kryeministri Edi Rama ka zhvilluar një takim jashtë fokusit të medias me Alex Soros, djalin e Xhorxh Soros. Natyrisht, është e vështirë të mësohet se çfarë është diskutuar realisht mes tyre. Por, nuk duket rastësore që, pak ditë pas këtij takimi, Edi Rama vendos të shkarkojë Ditmir Bushatin, kundërshtuesin e projektit Thaçi-Vuçiç për ridimensionimin e kufijve Kosovë-Serbi.
Dyshimi i ndikimit të Soros në këto lloj vendimmarrjesh të rëndësishme të kreut të Ekzekutivit shqiptar ka një bazë të fortë. Fondacioni Soros ka alokuar një fond prej rreth 600 mijë dollar, i cili u ndahet këshilltarëve të Edi Ramës, të cilët kanë pasur për detyrë detajimin e planit për ristrukturimin e qeverisë, pra ndarjen dhe bashkimin e ministrive, siç ndodhi me kabinetin “Rama 2”.
Me shumë mundësi, nëpërmjet këtij fondi, Soros-i i dikton Edi Ramës edhe emërimin apo shkarkimin e ministrave të tij. Shkarkimi i Ditmir Bushatit, me shumë hije, mund t’i sjellë më shumë problem Edi Ramës sesa shkarkimi i të gjithë ministrave të tjerë bashkë.
Sinjalet e para, Edi Rama i mori nga lajmet e Zërit të Amerikës dhe Dwelle-s gjermane.
