Nga Boldnews.al
Deputeti i Partisë Socialiste, Alket Hyseni, ka zgjedhur të festojë Vitin e Ri me të rinjtë e Sarandës në lokalin “Orange”, pronari i të cilit është akuzuar së fundmi për shkatërrim prone me zjarr dhe eksploziv.
Deputeti i fuqishëm i Jugut, një prej njerëzve më të afërt të kryesocialistit Edi Rama, ka publikuar në rrjetin e social “Facebook” një seri fotosh me të rinjtë sarandiotë, me të cilët ka trokitur gotat, duke uruar Vitin e Ri.
Festa luksoze është organizuar në lokalin “Orange”, i cili është në pronësi të shtetasit Evo (Spiro Iljadho). Ky person akuzohet nga dy banorë të Ksamilit dhe është aktualisht në ndjekje penale nga Prokuroria e Sarandës për veprën penale të “shkatërrimit të pronës me dashje, me lëndë eksplozive dhe me lëndë djegëse.
Në fillim të muajit Dhjetor, shtetasi Abdullah Skënderi ka kallëzuar penalisht pronarin e lokalit “Orange” se ka organizuar dhe orientuar disa persona për shkatërrimin me zjarr të pronës së tij, një njësi shërbimi në zonën e Ksamilit. Kallëzuesi Skënderi ka deklaruar para oficerëve të Policisë Gjyqësore se prona e tij, e ngritur në zonën bregdetare të Ksamilit, është shkatërruar me zjarr mëngjesin e datës 7 dhjetor 2018.
Skënderi kallëzon gjithashtu se njerëz të afërt të tij kanë njoftuar menjëherë policinë për dëmin që po i shkaktohej në pronë, por uniformat blu kanë ardhur me shumë vonesë, aq sa për të konstatuar dëmin në godinën e ngritur nga ana e tij prej vitesh. Abdullah Skënderi ka ngritur gishtin e akuzës ndaj pronarit të lokalit “Orange”, i cili, sipas kallëzuesit, po kërkonte prej kohësh që të zgjeronte aktivitetin e tij të biznesit edhe në territorin ku gjendej njësia e shërbimit (dyqan) në process legalizimi i shtetasit Abdullah Skënderi.
Pak ditë më vonë, një tjetër njësi shërbimi në proces legalizimi, shumë pranë godinës së shkatërruar të Abdullah Skënderit, rrëzohet në tokë, kësaj radhe me lëndë eksplozive. Edhe në rastin e dytë, policia është paraqitur në vendngjarje vetëm për të evidentuar dëmin. Sërish, personi i dyshuar si organizator i shkatërrimit të lokalit të dytë është pronari i lokalit “Orange”, Spiro Iljadho.
Këto ngjarje kanë tronditur banorët e Ksamilit, të cilët deklarojnë se autorët e këtyre ngjarjeve dihen, por këta persona kanë mbrojtjen e policisë dhe të strukturave të tjera policore.
Këto dyshime, banorët i bazojnë tek fakti se zyrtarë të ndryshëm lokalë e qëndrorë janë parë shpesh në lokalin “Orange” ose nën shoqërinë e pronarit të tij. Rasti më i fundit është pikërisht festa e organizuar nga “super-deputeti” i Jugut, Alket Hyseni.
Deputeti i Edi Ramës ka zgjedhur të festojë në lokalin e një personi të dyshuar për organizimin dhe kryerjev e veprave të rënda penale, duke konfirmuar në këtë mënyrë dyshimet e banorëve se pronari i këtij lokali ka lidhje të fuqishme me pushtetarët.
