I njohur ndryshe si “Njeriu meme”, Genc Sejko, ka folur pasditen e sotme për protestën e thirrur për tu mbajtur për 3 ditë rresht para Kryeministrisë, duke nisur nga dita e nesërme.
Teksa foli mbi mundësinë e arrestimi të organizatorëve dhe pjesëmarrësve në këtë protestë, Sejko tha se asgjë nuk do t’i ndalë ata, ndërsa shtoi se në polici nuk ka shkuar për të marrë leje, por për të lajmëruar mbajtjen e kësaj proteste.
“Disa protesta kanë me muaj që zgjasin, si ajo e Teatrit Kombëtar apo ajo e Astirit, të cilat janë konsideruar si të paligjshme. Nuk besoj se shqiptarët duhet të kenë frikë të dalin në protestë. Kjo do të jetë një protestë paqësore.
Çdo nismë e tillë është e mirëpritur dhe ka mbështetjen tonë. Duhet të dimë se shumica e atyre që janë larguar jetojnë në mënryë ilegale. Duhet të dimë se si ky propozim mund të aplikohet në jetën reale. Nisma duhet të jetë gjithëpërfshirëse, ku çdo shqiptar që jeton atje të mund të votojë, qoftë ky ilegalisht. Sesi do të arrihet, kjo duhet parë.
Ata më mohojnë mua një të drejtë kushtetuese. Unë nuk mora leje për të bërë një protestë, por njoftova policinë. Policia nuk mund të më ndalojë mua për të bërë një protestë. Policia mund të më ndaljë, le të bëjnë atë që duan, por unë dhe miqtë e mi do të protestojmë. Policisë i takon që të marrë masa për ruajtjen e rendit dhe sigurisë”, – tha Sejko.
Më tej ai tregoi se përse nesër protesta do të fillojë në orën 17:00, ku tha se kjo është bërë për shkak se qytetarët janë nëpër punë.
“Të premten e kemi menduar nga ora 17:00 për shkak se qytetarët janë në punë, ndërsa të shtunën e të dielën e kemi vendosur për ta nisur nga ora 12:00 me 19:00”, – tha Sejko.
Ai u shpreh se ka bërë disa takime në vende të ndryshme të vendit, për t’i ftuar në këtë protestë. Sejko tha se ka takuar grupe të ndryshme dhe janë shprehur të gatshëm për t’iu bashkuar kësaj proteste.
“Pas fillimit të protestës së studentëve në grupet që ne kemi, thamë se më duket se do të shkojmë për festë e jo për protestë. Mendonim që protesta do të merrte progres, dhe do të sillte më shumë. Nganjëherë ne e teprojmë duke vënë mbi supet e tyre një barrë që nuk e meritojnë.”, tha Sejko.
Në vijim ai u bëri thirrje të gjithë qytetarëve të bashkohen në këtë manifestim kundër sistemit politik në vend, ndërsa tha se edhe studentët duhet të bashkohen. Ai tha se kjo protestë është e gatshme të bashkohet me atë të studentëve.