Nga Boldnews.al
Një qark i mbyllur brenda sistemit të drejtësisë ka justifikuar disa dhjetra mijëra euro të gjyqtarit të Apelit Administrativ, Arjan Qafa, i kallëzuar penalisht për fshehje pasurie në vitin 2014.
Arjan Qafa kishte deklaruar pasurinë disa vite para se të bëhej gjyqtar, duke qenë se kishte mbajtur funksionin e Inspektorit të Këshillit të Lartë të Drejtësisë. Në mars 2014, pas një kontrolli të detajuar, Inspektorati i Lartë i Deklarimit dhe Kontrollit të Pasurive e Konfliktit të Interesave (ILDKPKI) konstatoi problematika të shumta me burimin e parave të Arjan Qafës dhe bashkëshortes së tij.
Në përfundim të atij kontrolli, ILDKPKI dorëzoi kallëzim penal në prokurorinë e Tiranës. Për këtë rast, institucioni i kontrollit publikoi edhe një njoftim zyrtar, ku renditeshin shkeljet e konstatuara. Konkretisht:
“Në përfundim të verifikimeve të kryera mbi deklaratat e interesave private të subjektit Arjan Qafa,-thotë ILDKPKI në njoftimin e datës 31 Mars 2014,- u konstatuan problemet si më poshtë vijon;
1.Fshehje e depozitës në shumën 1.000.000 lekë në Raiffesien Bank.
2.Fshehje të llogarisë rrjedhëse në shumën 2.400 Euro në Raiffeisen Bank.
3.Deklarim të rremë për dhuratat në vlerën 37.000 Euro, të cilat i ka disponuar cash dhe më pas kanë shërbyer si burim për blerje apartamenti.
4.Deklarim i rremë dhe mungesë e burimit ligjor financiar të vlerës prej 70.000 euro të deklaruar nga bashkëshortja si gjendje cash në deklarimin e interesave private të vitit 2008.
5.Deklarim i rremë për gjendjet cash të deklaruara nga bashkëshortja, në shumën prej 5.000.000 lekë e cila është përdorur si huadhënie duke përfituar; 900.000 lekë në vitin 2009; 900.000 lekë në vitin 2010; 1.200.000 lekë në vitin 2011,duke shtuar likujditetet cash për tre vitet në vazhdim me 3.000.000 lekë vetëm nga interesat.
6.Lidhur me kontratën e sipërmarjes për prenotimin e apartamentit me vlerën 40.000 Euro, subjekti ka paraqitur të dhëna kontradiktore në sqarimet e bëra në ILDKPKI, dhe rrjedhimisht deklarimet e tij janë të rreme.
Për sa më sipër subjekti Arjan Qafa ka konsumuar elementët e veprës penale të “ Fshehja ose deklarimi i rremë i pasurive të personave të zgjedhur dhe nëpunësve publikë ose i çdo personi që ka detyrim ligjor për deklarim”, të parashikuar nga neni 257/a i Kodit Penal dhe ndaj tij u depozitua kallëzim penal në Prokurorinë e Përgjithshme, njoftim Këshillit të Lartë të Drejtësisë për shkeljet e konstatuara dhe Drejtorisë së Përgjithshme të Parandalimit të Pastrimit të Parave.
Pas 3 muaj hetimesh, Prokuroria e Tiranës vendos pushimin e çështjes, duke argumentuar se i kallëzuari Arjan Qafa nuk kishte fshehur pasurinë apo të kishte bërë deklarim të rremë. Në hetim, prokuroria e kishte ndarë verifikimin e pasurive të Qafës në dy periudha. Në periudhën e parë përfshiheshin deklaratat e pasurisë nga formulari i parë, deri në vitin 2008, kohë kur bashkëshortja e Arjan Qafës deklaron se ka krijuar 70 mijë euro.
Për këtë periudhë kohore, prokuroria e Tiranës, në vendimin e pushimit, sqaron se nuk mund të kryhen hetime, për shkak të parashkrimit të veprës penale. Pra, në këtë mënyrë, Arjan Qafës dhe bashkëshortes së tij iu “amnistuan” 70 mijë euro, pa u kryer asnjë verifikim mbi ligjshmërinë e burimit.
Për pasuritë e krijuara në periudhën 2009-2013, prokuroria e Tiranës ka argumentuar sërish se nuk ka fshehje pasurie nga ana e Arjan Qafës. Në deklaratat e pasurisë për këtë periudhë, i kallëzuari Qafa ka deklaruar rreth 35 mijë euro “dhurata” nga familjarët e tij të afërt. Prokuroria e Tiranës, në hetimet e saj, është mjaftuar vetëm me deklarata huaje dhe deklarime të familjarëve të Qafës, të cilët pranojnë se i kanë dhënë atij dhurata. Nga hetimet e prokurorisë së Tiranës, nuk rezulton të jetë kryer asnjë verifikim nëse familjarët e personit nën hetim kishin apo jo mundësi reale për t’i krijuar këto shuma, të cilat më pas ia kanë dhënë “dhuratë” Arjan Qafës.
Gjithësesi, bazuar në këtë hetim sipërfaqësor, prokuroria e Tiranës vendos pushimin e hetimeve. Por ky vendim duket se nuk e ka kënaqur plotësisht inspektorin e atëhershëm të Këshillit të Lartë të Drejtësisë, sot gjyqtar i Apelit Administrativ.
Ai nuk ka qenë dakord që në vendimin e pushimit të prokurorisë, i cili, për një pjesë, ka argumentuar se nuk janë kryer hetime për shkak të efektit të parashkrimit. Arjan Qafa ka kërkuar në gjykatën e Tiranës ndryshimin e vendimit të pushimit dhe të shënohej që “fakti penal nuk ekziston”.
Kjo kërkesë e inspektorit të KLD-së, Arjan Qafa, u pranua nga ana e gjykatës së Tiranës. E, në këtë mënyrë, me një kartelë të pastër penale, ai hyri i qetë në garë dhe u zgjodh gjyqtar i Gjykatës së Apelit Administrativ, detyrë që vijon ta mbajë edhe sot, në pritje të procesit të Vetingut.
