Tre shqiptarë arritën të transportonin plot 7 milionë paund në më shumë se 80 fluturime nga aeroportet në Angli. Paratë e destinuara për në Shqipëri, dyshohet të jenë investuar kryesisht në fushën e ndërtimit, por edhe në biznese të tjera. Mediat e huaja shkruajnë se kokat e rrjetit të transportit të parave janë dy vëllezër shqiptarë me origjinë nga Tropoja, Jak dhe Gjelosh Kolicaj si dhe Faton Syberi.
Ata organizuan udhëtime për katër shtetas të tjerë, që vepruan si korrierë për të transportuar sasi të mëdha parash në bagazhet e tyre. Sipas mediave britanike, bëhet fjalë për mbi 80 udhëtime që u bënë nga grupi në mes të nëntorit 2016 dhe janarit 2018, në disa shtete, kryesisht Belgjikën dhe Greqinë për transportin e mëtejshëm të parave më pas drejt Shqipërisë.
“Gjelosh Kolicaj 37 vjeç dhe Jak Kolicaj 47 vjeç, çonin korrierët në aeroport dhe prisnin derisa ata te kalonin kontrollin e valixheve dhe pastaj largoheshin”, raportuan mediat angleze, të cilat i referohen të dhënave të dosjes hetimore.
Siç raportohet, në shtator 2017, Policia i kapi 180 mijë paund Faton Syberit, ndërsa ai u përpoq të udhëtonte në Selanik nga aeroporti i Stansted. Paratë ishin në valixhe ngjyre kafe, të mbështjella me qese dhe brenda një tjetër valixheje të brendshme. Mësohet se Gjelosh Kolicaj dhe Faton Syberi u deklaruan fajtorë dhe po ashtu edhe Jak Kolicaj.
Jak Kolicaj u dënua me 8 vjet burg, Gjelosh Kolicaj me 6 vjet dhe Faton Syberi me dy vjet e pesë muaj burg. Aaron Chappell, nga Agjencia Kombëtare e Krimit (NCA), tha se “Ky grup bëri një numër të konsiderueshëm udhëtimesh jashtë Britanisë së Madhe me sasi të mëdha të parave të gatshme të destinuara për Shqipërinë”.
Sipas tij, grupet e krimit të organizuar mbështeten te pastrimi e parave, për të përfituar nga krimi i tyre dhe për të riinvestuar në kriminalitet të mëtejshëm. Policia britanike nuk bëri të ditur nëse ka pasur dyshime për bashkëpunëtorë të tjerë dhe se si ky grup i organizuar arrinte të trafikonte shuma në sasi kaq të mëdha pikërisht nëpërmjet aeroporteve, ku valixhet kontrollohen nëpërmjet skanerit.