Nga Boldnews.al
Këshilli i Emërimeve në Drejtësi (KED) pritet të zhvillojë mbledhjen e parë konstituuese në fillim të Janarit 2019, por ai nuk do të jetë i gatshëm për të zgjedhur kandidatët për në Gjykatën Kushtetuese para vjeshtës së vitit të ardhshëm.
Pjesa më e madhe e anëtarëve të përzgjedhur me short në 8 Dhjetor 2018 nuk mund të ushtrojnë mandatin e tyre, para se ata të kalojnë në procesin e Vetingut. Nga 9 anëtarë që është parashikuar të ketë Këshilli i Emërimeve në Drejtësi, ai faktikisht ka vetëm 7. Në këtë këshill mungon një anëtar nga Prokuroritë e Apelit, për shkak të mungesës së kandidaturave që plotësonin kriteret ligjore. Gjithashtu, mungon edhe një anëtar nga Gjykata Kushtetuese, vakancë e krijuar pas shkarkimit nga detyra të gjyqtarit Bashkim Dedja.
Ndërkohë, nga 7 anëtarët e mbetur, vetëm 4 prej tyre kanë kaluar tashmë Vetingun, e konkretisht: Ardian Dvorani, anëtar i Gjykatës së Lartë, Vitore Tusha nga Gjykata Kushtetuese, Arta Marku nga Prokuroria e Përgjithshme dhe Fatjona Memçaj nga Prokuroria e Apelit.
Ndërkohë, pjesa tjetër janë në proces vetingu. Konkretisht, Fatri Islamaj nga Gjykatat e Apelit është përfshirë në proces Vetingu në 16 nëntor 2018. Sipas standarteve kohore të ndjekura deri më tani, procesi ndaj tij mund të përfundojë rreth verës 2019.
Anëtarja tjetër nga gjykatat e Apelit, Margarita Buhali, ende nuk është shortuar nga Komisioni i Pavarur i Kualifikimit (KPK) për të nisur procesi i vetingut ndaj saj. Ajo pritet të kalojë menjëherë në rivlerësim, por procesi mund të dojë nga 8-12 muaj për të përfunduar.
Edhe anëtari zëvendësues nga gjykatat e Apelit, Gurali Brahimllari, është ende në proces vetingu. Rivlerësimi për të ka nisur me shortin e hedhur në 16 Maj 2018 dhe, me shumë mundësi, ai pritet të dalë në seancë dëgjimore në periudhën shkurt-mars 2019.
Anëtari i fundit, përfaqësues i gjykatës Administrative të shkallës së parë, Eriol Roshi, është gjithashtu në proces vetingu. Ai është shortuar në të njëjtën ditë me Gurali Brahimllarin, pra në Maj 2018 dhe pritet të dalë para Komisionit të Vetingut në shkurt-mars 2019.
Këshilli i Emërimeve në Drejtësi është një prej strukturave të reja të Reformës në Drejtësi dhe ka për detyrë që të shqyrtojë kandidaturat për anëtarë të Gjykatës Kushtetuese. KED është një strukturë me mandat një-vjeçar.
Këshilli i Emërimeve në Drejtësi, i cili duhet të ushtronte funksionet gjatë vitit 2018, e mbylli mandatin pa kryer asnjë detyrë. KED e vitit që po mbyllet zhvilloi mbledhjen e parë konstiuuese në Mars 2018. Në atë mbledhje, ndër të tjerë, merrte pjesë edhe dr. në shkencat mjedisore, Ulsi Manja, kryetar i Komisioneve të Ligjeve.
Ai argumentoi se Këshilli i Emërimeve në Drejtësi nuk duhet të niste detyrën e tij pa kaluar në proces vetingu të gjithë anëtarët e tij. Nga e thëna e Ulsiut, në të bërë. KED pezulloi veprimtarinë e saj, derisa Komisioni i Vetingut të kryente procesin e rivlerësimit. Në përfundim të këtij procesi, një pjesë e anëtarëve të KED-së u shkarkuan nga detyra, duke e shndërruar atë strukturë në jo-funksionale.
Standarti i vendosur vitin e kaluar është i aplikueshëm edhe për anëtarët e Këshillit të Emërimeve në Drejtësi të zgjedhur për vitin 2009. Në këtë mënyrë, KED do të nisë procesin e përzgjedhjes së kandidatëve për në Gjykatën Kushtetuese në momentin kur të gjithë anëtarët e saj të kenë kaluar me sukses Vetingun.
Praktikisht, me 3 anëtarë dhe një zëvendësues që janë ende në proces Vetingu, pjesa tjetër e KED-së që është konfirmuar në detyrë, do të qëndrojë pasive.
Gjykata Kushtetuese e Republikës së Shqipërisë është inekzistente prej thuajse 8 muajsh. Nga 9 anëtarë, Gjykata më e lartë shqiptare ka në detyrë vetëm anëtaren Vitore Tusha, të cilës gjithashtu i ka përfunduar mandati.
