Baton Haxhiu, këshilltar i kryeministrit Edi Rama, deklaroi dje në emisionin ‘Opinion’ se shumë prej ministrave kanë qenë të paaftë në realizimin e detyrave dhe kanë marrë mbështetje të pamerituar në publik nga kreu i qeverisë.
Haxhiu tha se kush ministër nuk ka punuar siç duhet, duhet të shkarkohet nga qeveria.
Edhe televizioni ‘Top Channel’ raporton sot “Rama ka dhënë sinjale se do të bëjë ndryshime, ndërsa duket se ka ardhur koha që ato të jenë shumë të thella.” Ky televizion njofton edhe për mbledhjen e Kryesisë së PS më 24 dhjetor, e cila do të jetë një analizë e punës së qeverisë para mbledhjes së Asamblesë.
“Ndryshimi i ndonjë ministri për të kënaqur egon e protestuesve nuk do të jetë zgjidhje, as për studentët, as për vendin dhe as për vet mazhorancën e Ramës. Studentët ngelës po e ndihmojnë Ramën të heqë ministrat ngelës”, raporton ‘TCH’.
Pavarësisht se kush është burimi i këtyre lajmeve, ditët e fundit është vënë re një tendecë për të bërë gjithnjë e më shumë fajtorë ministrat për skandalet që janë bërë publike, duke i hequr përgjegjësinë kryeministrit Rama, i cili drejton ne të vërtetë punët në qeveri.
