Kryetari i partisë Demokratike, Lulzim Basha ka analizuar me shifra buxhetin e qeverisë duke ju referuar edhe kostove që mbartin kërkesat e paraqitura nga studentët.
Bash tha se kërkesat janë plotësisht të realizueshme duke thënë se ka para për të dyfishuar buxhetin për arsimin e lartë por mungon vullneti i qeverisë. Kreu i demokratëve, theksoi se nuk është i mjaftueshëm vetëm dyfishimi i buxhetit por nevojitet një reformë e thellë e cila duhet të nis me anulimin e ligjit të arsimit të lartë.
“Para ka për të dyfishuar buxhetin për arsimin e lartë por nuk ka vullnet. Vullneti i Edi Ramës dhe i bandës së tij të babëzitur të hajdutëve, që kanë kaluar në overdozë parash, është që këto para t’i vjedhin dhe t’i bëjnë rrush e kumbulla.
Natyrisht thjesht dhe vetëm dyfishimi i buxhetit nuk mjafton, duhet një reformë e thellë e cila fillon me anulimin e ligjit për arsimin e lartë. Duhet një reformë e thellë që të udhëhiqet nga parimet e demokratizimit, mirëmenaxhimit, përgjegjësisë për cilësinë e mësimdhënies përmes transparencës dhe vlerësimit të pavarur, rankimit të famshëm që kurrë nuk erdhi, sepse studentët nuk duan thjeshtë dhe vetëm ulje tarifash dhe rritje shpenzimesh për ta por mbi të gjitha duan që paratë e taksapaguesve, të prindërve të tyre, të shkojnë për shpenzime të drejta”, u shpreh Basha në foltoren e Kuvendit.
Kreu i opozitës tha se PD ka një platformë për arsimin të cilën do ta diskutojë me pedagogët dhe studentët. “Reforma duhet të jetë e thellë, e gjithanshme. Partia Demokratike ka një platformë të cilën do ta diskutojë me pedagogët dhe me studentët, por sot”, theksoi Basha.
