Nga Boldnews.al
Ambasadat e Shteteve të Bashkuara në shumë vende të botës e kanë praktikë rutinore të punës që të njoftojnë qytetarët e tyre të qëndrojnë larg vendeve të mbipopulluara, në rastet kur ka protesta e tubime.
Edhe në Shqipërisë, ambasada e SHBA ka bërë shpesh thirrje për qytetarët e saj që jetojnë në vendin tonë, të qëndrojnë larg protestave. Por, kjo “thirrje” rutinore, ka munguar gjatë 10 ditëve të protestës së studentëve kundër shurdhërisë së Edi Ramës përballë kërkesave të tyre.
Ambasada e SHBA-së, e cila është shumë e ndjeshme për të siguruar jetën dhe shëndetin e qytetarëve amerikanë, ndjek me vëmendje çdo zhvillim, sidomos në Tiranë. Pra, natyrisht, zyrtarët e saj vijojnë të ndjekin protestat e përditshme të studentëve shqiptarë, të cilët kërkojnë marrjen e masave të menjëhershme për përmirësimin e kushteve të tyre.
E, megjithatë, nga zyrat e Rrugës së Elbasanit, nuk ka dalë asnjë njoftim formal, drejtuar qytetarëve amerikanë që jetojnë e punojnë në Shqipëri, që të qëndrojnë larg protestës.
Ndoshta, ambasada e SHBA në Tiranë nuk ka asnjë informacion apo indicje që protesta të përshkallëzohet në akte vandalizmi. Ky variant mbështetet në faktin se studentët kanë deklaruar se protesta do të jetë paqësore dhe ashtu ka ndodhur deri më tani.
Por, një variant i dytë, i cili po diskutohet nga zyrtarë të nivele të ndryshme të qeverisjes, është ai që protesta studentore ka pasur në mos një nxitje, një mbështetje të heshtur nga ana e autoriteteve amerikane në Tiranë.
Pikërisht, ky variant i dytë po shqetëson si “zyrtarucët”, ashtu edhe persona me pushtet të lartë politik në qeverisjen e Edi Ramës. Kjo kategori zyrtarësh shqetësohet më shumë për faktin që, nëse protesta studentore ka një mbështetje nga ana e zyrtarëve amerikanë, atëherë e gjithë kjo konsiderohet si një minus i madh për pushtetin e Edi Ramës.
Kryeministri shqiptar, në pjesën më të madhe të mandatit të tij qeverisës 5-vjeçar, pati në krah ambasadorin Donald Lu. Me diplomatin amerikan në krah, kryeministri ngriti dhe forcoi pushtetin e tij politik, jo vetëm tek pushteti ekzekutiv, por edhe tek ai legjislativ dhe gjyqësor.
Me të gjithë pushtetet në duart e tij, Edi Rama tashmë ka marrë pozitat e një pushtetari autokrat. Ai po udhëheq me dorë të hekurt dhe duke iu larguar gjithnjë e më shumë vlerave të demokracisë.
Me shumë mundësi, nuancat autokratike të dëshmuara prej kohësh nga kryeministri Rama, mund të kenë ndezur sinjale të kuqe në disa zyra të ambasadës amerikane. Protesta e studentëve mund të jetë një formë e mirë për t’i treguar Edi Ramës se tashmë ka kaluar disa vija, të cilat rrezikojnë demokracinë në Shqipëri.
Autoritetet amerikane, të ndjeshme për demokracinë në Ballkan, mesa duket po i japin një mesazh kryeministrit shqiptar se mbështetjen që i kanë dhënë, ai po e shndërron në forcimin e pushtetit autokratik.
Ky mesazh mund të përcillet pikërisht me protestën e studentëve, të cilët nuk kanë paraqitur tendenca politike.
