Në kuadër të operacionit “Vol-Vo 4”, policia arrestoi Emanuel Gjurën, banues në Lezhë, me detyrë noter. Sipas saj që raporton gazeta ‘Panorama’, ai u ndalua teksa po lëvizte me automjetin e tij në autostradën Lezhë-Laç, ndërsa mësohet se në momentin e ndalimit nuk i ka bërë rezistencë Policisë.
Për 32-vjeçarin që ishte në kërkim, Gjykata e Shkallës së Parë për Krimet e Rënda Tiranë ka caktuar masën e sigurisë “Arrest me burg” për veprat penale “Shpërdorim detyre”, “Grup të strukturuar kriminal”, “Falsifikim të dokumenteve, vulave, stampave e formularëve” si dhe për “Shpërdorim toke”.
Megaoperacioni “Vol-Vo 4”, i shtrirë në 12 qytete të vendit, çoi në pranga në muajin tetor 34 persona, midis të cilëve edhe dy ish-deputetët e Partisë Socialiste, Arben Ndoka dhe Arben Çuko.
“Panorama” raporton se Arben Ndoka rezultoi se kishte përfituar tokë në zonën bregdetare të Shëngjinit përmes dokumenteve të falsifikuara bashkë me vëllain e tij dhe pikërisht për përfitimin e tokës nga familja Ndoka, akuzohet dhe noteri Emanuel Gjura, i cili ka kryer tjetërsimin përmes shitblerjeve fiktive në zyrën e tij noteriale.
