Ilir Meta ka kohë që është kthyer në një President me kohë të pjesshme në Shqipëri dhe këtë e kanë parë gjithë shqiptarët, të cilët nga maji i këtij viti, ditë për ditë, janë përballur me fotot dhe videot e kryetarit të shtetit në rrjetet sociale, që tregojnë vendet ku ka ecur, ngrënë dhe “buajtur”.
I ka rënë vendit kryq e tërthor, ku më shumë ka qëdruar në Alpet e Shqipërisë duke eksploruar Shkodrën dhe Mbishkodrën, Tropojën dhe tërë Malësinë e Gjakovës deri në Rugovë, i shoqëruar nga “eskorta” e tij e përhershme e këshilltarëve të brendshëm dhe të jashtëm.
Ilir Meta dje nuk ka qënë në Shqipëri, ndoshta dhe ditën e sotme mungon për t’u kthyer nga mbrëmja, mungesë që është argumentuar me faktin se zv.sekretarja e Përgjithshme e NATO-s nuk e kishte në axhendën e takimeve, në vizitën e saj në Tiranë.
Atëherë lind pyetja: Kush e ka firmosur kthimin e buxhetit të shtetit në Kuvend, përderisa sipas presidencës dhe zëdhënësit të saj, vendimi është marrë në çast, pas deklaratave të kreut të grupit parlamentar të PS Taulant Balla që kundërshtoi amendamentet e LSI për studentët?!
Ndërkohë, një habi të tillë ka shfaqur dhe kryetari i Komisionit të Ekonomisë, Erjon Braçe, kur thotë se ligji u dërgua vetëm një ditë më parë në Presidencë, ndërsa Meta ndodhet jashtë vendit dhe sot u shpreh zyrtarisht, duke e rikthyer.
“Presidenti është larguar nga vendi, ndërkohë që ky dokumentet është dorëzuar, Presidenti nuk ka qenë në zyrë. Kjo tregon mungesë serioziteti. Presidenti s’është në Shqipëri, si e ka shqyrtuar? Kjo një pyetje akoma më e madhe se firma. Ligji është dorëzuar dje, ai nuk ka qenë në zyrë.
Si e mori informimin për buxhetin e arsimit të lartë”, reagon Braçe mes të tjerave. /Burimi: Pamfleti/