Nga Boldnews.al
Drejtori i Top Channel, Ben Blushi dhe drejtuesi i emisionit “Top Show”, Alban Dudushi, janë vënë në qendër të kritikave të qytetarëve, për shkak të debatit të shtirur të kryeministrit Edi Rama me disa ‘studentë”, të cilët ishin pjesë e strukturave të FRESH-it.
Disa prej tyre, duke përdorur kombinimin e emrave të tyre, e kanë konsideruar dyshen mediatike si “Beni-Bani”, duke iu referuar një personazhi të famshëm të botës së fëmijëve, lepurushit që shoqëronte “Lizën në botën e çudirave”. Gjetja është shumë e goditur.
Ben Blushi dhe Alban Dudushi, njëlloj si në përallën e Çarls Dogson (Ljuis Carrol), e vendosën Edi Ramën në një realitet të rremë. Njëlloj si personazhi Liza, Edi Rama luftonte me “kundërshtarët” e fortë, disa letra bixhozi, role që në studion e Dudushit ia kishin ngarkuar disa freshistëve që silleshin si studentë proteste.
Por, ndryshe nga Liza e përrallës, Edi Rama, kur u zgjua nga gjumi i këtij emisioni bajat, nuk arriti të kuptonte se studio e “Beni-Banit” në Top Channel ishte thjeshtë një ëndërr e bukur.
Në ditën e 8-të të protestës, kur Edi Rama ndjeu fort presionin e protestave të studentëve, zyra e tij e propagandës dhe Top Channel tentuan të organizonin një tryezë dialogu. Vendi i këtij dialogu ishte studio e “Top Show-t” të drejtuar nga Dudushi. Por, organizatorët nuk arritën të siguronin protestues reale, të cilët refuzojnë çdo lloj dialogu me Edi Ramën, pa plotësuar 8 kushte që ata i konsiderojnë të panegociueshme.
Në këtë situatë, kur Edi Ramës i duheshin disa të rinj për dekor, u gjet zgjidhja-u morën disa djem e vajza të forumit rinor socialist dhe u prezantuan si “studentë protestues”. Kjo farsë u zbulua shumë shpejt dhe rrjetet sociale u mbushën me fotografitë e “studentëve” të Beni-Banit nëpër aktivitete të ndryshme të Partisë Socialiste.
Vijimi ishte katastrofik. Edi Rama vijoi show-n e pështirë, të cilit, me shumë mundësi, asnjë shqiptar nuk e ka kapërdirë.
Më poshtë janë disa prej komenteve të qytetarëve në faqen zyrtare të emisionit “Top Show” në rrjetin social “Facebook”. Nuk është i nevojshëm asnjë koment mbi komentet e publikut.
