Policia italiane ka kryer një operacion të gjerë në zonën e ish-Reggianës, në Reggio Emilia, duke çmontuar një organizatë të tregtarëve të drogës. Nga 27 urdhër-arreste të lëshuara, 19 janë në masën e sigurisë “arrest me burg”.
Gjatë hetimeve në kuadër të operacionit “Rexit”, janë arrestuar në flagrancë 34 persona, ndërsa janë konfiskuar sasi të mëdha droge, 9 kg heroinë, 2 kg kokainë, 3 kg hashash, 1 kilogram marihuanë dhe 119 bimë marihuane.
“Ansa” shkruan se në krye të strukturës piramidale ishte 41 vjeçari shqiptar Banush Hysi. Ai jetonte në një ndërtesë që u dogj natën e së dielës duke shkaktuar dy të vdekur dhe 38 persona të asfiksuar nga tymi, duke përfshirë edhe shqiptarin dhe familjen e tij.
Pas largimit nga spitali një ditë pas ngjarjes, ai përfundoi në pranga gjatë natës. Hetuesit janë duke hetuar nëse në bodrumin e ndërtesës së djegur, ka prani të lëndëve narkotike.
Sipas hetuesve, Hysi ka qarkulluar disa kg heroinë në të gjithë qytetin. Ai konsiderohet si “kreu” i grupit i shoqëruar me dy asistentë që kanë furnizuar zinxhirin e shitjes së lëndëve narkotike në zonë deri tek shitësit e rrugës./oranews
