Përshkallëzohet protesta e studentëve. Pasi protestuan për 6 orë me radhë përpara Ministrisë së Arsimit, qeveria nuk reagoi për ultimatumin e vendosur prej tyre për pranimin e 8 kërkesave.
Si rrjedhojë studentët kanë marshuar në këmbë në drejtim të “Zogut të Zi” ku kanë bllokuar rrethrrotullimin duke mos lejuar kalimin e asnjë automjeti në një prej arterieve kryesore në hyrje të Tiranës.
Me thirrjet “E duam Shqipërinë si gjithë Europa” studentët paralajmërojnë se nuk kanë ndërmend të tërhiqen, por përkundrazi protesta e tyre do përshkallëzohet edhe më nëse arroganca e Edi Ramës do vijojë.
Ndërkohë, një pjesë e sudentëve vijojnë të qëndrojnë përpara Ministrisë së Arsimit duke thirrur himnin kombëtar dhe këngë patriotike. Ata kanë pastruar edhe mbeturinat përpara Ministrisë. Studentët shprehen se do protestojnë edhe nesër dhe çdo ditë në vijim deri në realizimin e kërkesave të tyre.
