Prokuroria e Lodit i ka kërkuar Gjykatës së Krimeve të Rënda të Milanos në Itali, dënimin me burgim përjetë për Franco Vignatin. 64-vjeçari italian akuzohet për vrasjen e shqiptares Lavdjie Kruja, e njohur edhe si Dea. Lajmi i pretencës së prokurorisë bëhet i ditur nga mediat italiane.
Siç raporton “Giornale di Lodi” në versionin online duke iu referuar prokurorisë, Franco Maurizio Maria Vignati, pensionist 64-vjeçar nga Miradolo Terme, akuzohet si autori i varjes me paramendim të gruas shqiptare dy vite më parë me një plumb në qafë dhe hedhjes së trupit të saj në lumin “Po”.
Trupi i pajetë u gjet në lumë më 8 qershor të të njëjtit vit, në Monticelli d’Ongina, komunë ku italiani më vitin 2009 ka qenë këshilltar komunal për kulturën, i partisë “Lega Nord”.
Vignati, sipas prokurorisë, e kishte kryer vrasjen, pasi gruaja shqiptare i kishte komunikuar se, do ta ndërpriste marrëdhënien sentimentale me të.
Rreth 500 faqe akte dhe rreth 20 CD me përgjigje janë provat e paraqitura nga prokuroria në gjykatë, ndaj pensionistit italian. Franco Vignati, i cili vijon të pretendoje se është i pafajshëm, akuzohet vrasje me paramendim për arsye të dobëta, fshehje të kufomës dhe armëmbajtje pa leje.
Dea u ekzekutua në moshën 40 vjeçe. Ajo punonte në Itali si shërbyese dhe kishte dy fëmijë. Gruaja u zhduk në mënyrë misterioze më 30 maj 2016. Trupi i pajetë u gjet në ujërat e lumit “Po” më 8 qershor. Sipas prokurorisë, Dea e kishte lënë italianin 6 ditë para se vritej. Ajo kishte bashkëjetuar me të që prej një viti e gjysmë.
